जॅकी दादाने का केली मरण्याची गोष्ट?

अभिनेता जॅकी श्रॉफ(Jackie Shroff) म्हणजे सगळयांचा लाडका जग्गू दादा. त्यांची 'बिडू' भाषा सर्वांच्याच मनाला भिडते. मग अगदी त्याच्यासमोर स्टायलिश बॉलीवूडकर असोत की सर्वसामान्य प्रेक्षकवर्ग. पण आज असं काय झालंय आपल्या जग्गू दादाच्या आयुष्यात की तो जन्म-मृत्यूवर बोलायला लागलाय. त्याचा एक व्हिडीओ व्हायरल झालाय त्यात त्यानं स्वतःच्या मरणावरही थेट भाष्य केलंय. आता त्याचं हे भाष्य ऐकून चाहता वर्ग मात्र नाराज झालाय,थोडासा दुखावलाय. आपला लाडका प्रेमळ नट जर असं काही बाही बोलला तर वाईट वाटणारंच न.

त्या व्हिडीओत जॅकी श्रॉफ म्हणाले आहेत,''सगळ्यांना एक दिवस हे शरीर सोडून जायचंय मरणाच्या वाटेनं. माझी आई गेली,माझे वडील गेले,माझा भाऊ गेला. एक दिवस मी ही जाईन. पण जेव्हा लोक जातात तेव्हा तुमच्या आयुष्यात नवीन लोक येतातही. माझ्या आयुष्यात माझी बायको आली,टायगर आला,कृष्णा आली. उद्या मी गेल्यावरही कुणीतरी नवीन ती जागा घेणारंच. हे निसर्गाचं चक्र असंच सुरू राहणार. आपण फक्त जगत रहायचं''. याचवेळेस त्यांनी लोकांनाही जीवन कसं जगा याविषयावरही चांगलं सांगितलं आहे.

ते लोकांना उद्देशून म्हणालेयत,''तुम्ही आपलं दुःख उगाळत बसू नका. तुमच्या आजुबाजूचं दुःख पाहिलंत की तुम्हाला तुमचं दुःख काहीच नाही वाटणार. आयुष्य छोटं आहे,त्यामुळे देवानं जे आयुष्य दिलंय ते आनंदात जगा. लोकांना आनंदात जगु द्या. आपल्याकडे जे आहे त्यात आनंद माना''. जॅकी दादानं ही मात्र लाख पते की बात सांगितली आहे.