तैमुरला झाला भाऊ, करीनाने दिला गोंडस बाळाला जन्म

मुंबई- अभिनेत्री करीना कपूर खान दुसऱ्यांदा आई झाली असून तिने मुलाला जन्म दिला आहे. करीनाला मुंबईतील ब्रीज कँडी रुग्णालयात दाखल करण्यात आलं होतं. ऑगस्ट २०२० मध्ये करीना गरोदर असल्याची आनंदाची बातमी सैफ अली खानने सोशल मीडियावर दिली होती. सैफ व करीनाला चार वर्षांचा मुलगा तैमुरसुद्धा आहे. त्यानंतर आता पुन्हा एकदा करीनाला पुत्ररत्न प्राप्त झाले आहे. मात्र अद्याप करीना किंवा सैफकडून याची अधिकृतरित्या माहिती देण्यात आली नाही. मात्र सोशल मीडियावरून या दोघांवर शुभेच्छांचा वर्षाव होत आहे. 

पत्नी गरोदर असताना अभिनेत्याचं निधन; चिमुकल्याकडून वडिलांच्या शेवटच्या...

गेल्या काही दिवसांपासून करीनाच्या डिलिव्हरीच्या चर्चांना उधाण आलं होतं. करीनाच्या वडिलांनी एका मुलाखतीत तिची ड्यु डेट १५ फेब्रुवारी सांगितली होती. तेव्हापासून सोशल मीडियावर करीनाच्या बाळंतपणाची जोरदार चर्चा होती. करीना व तैमुरचा एका लहान बाळासोबत फोटोसुद्धा व्हायरल झाला होता. मात्र हा फोटो एक वर्ष जुना असून करीनाच्या मैत्रिणीच्या बाळासोबतचा असल्याचं स्पष्ट झालं.

सैफ व करीनाने २०१२ मध्ये लग्न केलं. 'टशन' या चित्रपटाच्या शूटिंगदरम्यान हे दोघं एकमेकांच्या प्रेमात पडले. २० डिसेंबर २०१६ रोजी तैमुरचा जन्म झाला. दुसऱ्या बाळाच्या जन्माआधी सैफ व करीना नवीन घरात शिफ्ट झाले. गरोदरपणादरम्यान करीना चित्रपटाचे शूटिंग, जाहिरातींसाठी काम करत होती. याशिवाय गरोदरपणातील योगसाधनेचं महत्त्वसुद्धा ती सोशल मीडियावरील पोस्टद्वारे पटवून देत होती.