KBC 13: ..अन् बिग बींनी अचानक निर्मात्यांना शो थांबवायला सांगितलं

'कौन बनेगा करोडपती १३' या KBC 13 शोचा नवीन प्रोमो सोनी एंटरटेन्मेंट टेलिव्हिजनच्या इन्स्टाग्राम पेजवर शेअर करण्यात आला. या व्हिडीओमध्ये सूत्रसंचालक अमिताभ बच्चन Amitabh Bachchan हे निर्मात्यांना शो मध्येच थांबवण्यास सांगताना दिसत आहेत. शोमध्ये भाग घेतलेली स्पर्धक नम्रता शाह यांच्यासोबत चहा प्यायला जाण्यासाठी त्यांनी निर्मात्यांना शो थांबवण्याची विनंती केली आहे. बिग बींचा हा मजेशीर व्हिडीओ सध्या सोशल मीडियावर व्हायरल होत आहे.

स्पर्धक नम्रता या हॉटसीटवर येताच बिग बी त्यांचं कौतुक करू लागतात. मी तुम्हाला अमितजी म्हणून हाक मारू का, असं त्यांनी विचारताच, बिग बी म्हणतात, "मला अमित म्हणा." "प्रॉड्युसरजी, हा कार्यक्रम इथेच बंद करा, मला नम्रताजींसोबत बाहेर चहा प्यायला जायचं आहे", असं बिग बी पुढे म्हणतात. हे ऐकून उपस्थित प्रेक्षकसुद्धा हसू लागतात.

नम्रता यांनी यावेळी 'कलंक' चित्रपटातील 'घर मोरे परदेसियाँ' या गाण्यावर नृत्यदेखील सादर केलं. त्यांचं नृत्यकौशल्य पाहून बिग बीसुद्धा अवाक् झाले. बिग बी आणि नम्रता यांच्यातील संवाद प्रेक्षकांना आगामी एपिसोडमध्ये पहायला मिळणार आहे. याच एपिसोडमधील तिसरा स्पर्धक एक कोटी रुपये जिंकणार आहे. १४ प्रश्नांची अचूक उत्तरं देऊन हा स्पर्धक कोट्यधीश होणार आहे.