केतकी चितळे पुन्हा बरळली; शरद पवारांविषयी केली आक्षेपार्ह पोस्ट

मुंबई : टीव्ही अभिनेत्री केतकी चितळे ही अधुनमधून आपल्या वादग्रस्त वक्तव्यांमुळं चर्चेत असते. आता तिनं पुन्हा एकदा असाच प्रकार केला असून यावेळी तिनं राज्यातील ज्येष्ठ नेते आणि राष्ट्रवादी काँग्रेसचे अध्यक्ष शरद पवार यांच्यावर आक्षापार्ह शब्दात टीका केली आहे. (Ketaki Chitale made offensive post about Sharad Pawar)

केतकीनं आपल्या फेसबुक अकाऊंटवरुन एक पोस्ट केली आहे. अॅड. नितीन भावे नामक व्यक्तीची ही पोस्ट असून ती तिनं आपल्या वॉलवर पोस्ट केली आहे. या पोस्टमध्ये शरद पवार यांच्यावर अत्यंत हीन दर्जाची टीका करण्यात आली आहे. यामध्ये "ऐंशी झाले आता उरक, वाट पाहतोय नरक" असे शब्द वापरण्यात आले आहेत.

केतकीच्या पोस्टचा जवाहर राठोडांच्या कवीतेशी संदर्भ

नुकतीच शरद पवार यांनी साताऱ्यात भाषणादरम्यान, कवी जवाहर राठोड यांची एक कविता वाचून दाखवली होती. कष्टकऱ्यांची व्यथा सांगणाऱ्या या कवितेत हिंदू देवदेवतांवर टीकात्मक भाष्य करण्यात आलं आहे. यावरुन शरद पवारांनी देव-देवतांचे बाप काढल्याचा आरोप त्यांच्यावर करण्यात आला होता. यावरुनच केतकीनं शरद पवारांवर आक्षेपार्ह भाषेत टीका केली आहे.

केतकी चितळे ही मराठी मालिकाविश्वातील अभिनेत्री असून बऱ्याच काळापासून ती छोट्या पडद्यापासून दूर आहे. पण अधूनमधून ती आपल्या सोशल मीडियावरुन वादग्रस्त विधानं करताना दिसून आली आहे. त्यामुळं तिला अनेकदा नेटकऱ्यांकडून ट्रोलही व्हावं लागलं आहे.