Ketaki Mategaonkar: प्रेमाचं वेड लावणारी केतकी ८ वर्षांनी करतेय कमबॅक, नव्या सिनेमाची घोषणा

Ketaki Mategaonkar New Movie: संपूर्ण महाराष्ट्राला प्रेमाचे वेड लावणारी अभिनेत्री म्हणजे केतकी माटेगावकर. केतकी अनेक वर्षांपासून मराठी इंडस्ट्रीतून गायब होती. २०१५ ला आलेल्या टाईमपास २ सिनेमानंतर केतकीचा कोणताही नवा सिनेमा आला नाही. केतकीचे चाहते तिच्या नव्या सिनेमाची वाट बघत होते. अखेर चाहत्यांची प्रतीक्षा संपली आहे. नवीन वर्षात केतकीने तिच्या आगामी सिनेमाची घोषणा केलीय.

केतकी माटेगावकर 'मीरा' या आगामी मराठी सिनेमात झळकणार आहे. नुकतीच केतकीने तिच्या सोशल मीडियावर मीरा सिनेमाला क्लॅप देतानाचा व्हिडिओ पोस्ट केलाय. या व्हिडिओत केतकी एकदम आनंदात दिसत आहे. आणि नवीन वर्षाची धमाकेदार सुरुवात, माझ्यावर प्रेम करणाऱ्या सर्वांसाठी असं कॅप्शन देऊन केतकीने तिच्या नव्या सिनेमाविषयी सांगितलं आहे. केदार दिवेकर या नवीन सिनेमाचं दिग्दर्शन करणार आहेत.

केतकी माटेगावकर तिच्या अभिनयाने आणि गायनाने गेली अनेक वर्ष मराठी इंडस्ट्री गाजवत आहे. सा रे ग म प लिटिल चॅम्प्स च्या माध्यमातून केतकीने अगदी लहान वयात तिच्या सुरांची जादू दाखवली. पुढे केतकीने सुजय डहाके यांच्या 'शाळा' सिनेमातून अभिनय क्षेत्रात पदार्पण केलं. शाळा या पहिल्याच सिनेमातून केतकीने उत्कृष्ट काम करत सर्वांना तिची दाखल घ्यायला लावली.

शाळा नंतर केतकीच्या अभिनयाची गाडी सुसाट सुरू झाली. तिने मागे वळून पाहिले नाही. शाळा नंतर केतकीने 'काकस्पर्श', 'तानी' अशा सिनेमांमध्ये काम केले. पण केतकीला खरी ओळख आणि प्रसिद्धी मिळाली 'टाईमपास' सिनेमातून. प्रथमेश परब सोबत केतकीची जोडी जमली. आणि पुढे दोघांच्या जोडीने बॉक्स ऑफिसवर एकच धिंगाणा घातला. टाईमपास नंतर टाईमपास २ मध्ये सुद्धा केतकीच्या अभिनयाची झलक दिसली. आता मीरा सिनेमाच्या निमित्ताने केतकी ८ वर्षानंतर मराठी इंडस्ट्रीत कमबॅक करतेय.