'कंगना तुझी लाज वाटते', लेफ्टनंट जनरल डॉ. माधुरी कानिटकरांचं 'ते' ट्विट फेक

मुंबई- अभिनेत्री उर्मिला मातोंडकर आणि कंगना रनौत यांच्यातील वाद विकोपाला गेला आहे. कंगनाने उर्मिलाचा सॉफ्ट पॉर्न स्टार असा उल्लेख केल्यानंतर या वादाला आणखी तोंड फुटलं आहे. काहीजण कंगनाचं समर्थन करत आहेत तर काहींनी कंगनाला तिच्या या विधानावरुन आदराने बोलण्याचे सल्ले दिले आहेत. अनेक स्तरांतून यावर प्रतिक्रिया उमटत असताना लेफ्टनंट जनरल डॉ. माधुरी कानिटकरांचं एक ट्विट देखील व्हायरल होत होतं.

हे ही वाचा: अभिनेते कमल हासन यांनी त्यांच्या २३२ व्या सिनेमाची केली घोषणा  

डॉ. माधुरी कानिटकर यांनी कंगनाला 'तुझी लाज वाटते' अशा आशयाचं ट्विट केलं होतं मात्र हे ट्विट फेक असल्याचं आता समोर येत आहे. व्हायरल झालेल्या या ट्विटमध्ये डॉ. माधुरी कानिटकर यांनी कंगनाला विरोध दर्शवत उर्मिलाची बाजु घेतल्याचं दिसून आलं होतं. या ट्विटसोबतंच कंगनाचा उर्मिलाविरोधात विधान करणारा व्हिडिओही शेअर करण्यात आला होता. 

डॉ. माधुरी कानिटकर यांच्या नावाने करण्यात आलेल्या या ट्विटमध्ये म्हटलं गेलं होतं की, 'कंगना रनौत तुझी लाज वाटते, मी सहसा कुणाबाबत अशी प्रतिक्रिया देत नाही मात्र एक महिला म्हणून मला यामुळे खूप वेदना झाल्या आहे. उर्मिला मातोंडकरजी आम्हाला तुमचा सार्थ अभिमान आहे.'

कंगनाने एका मुलाखतीत म्हटलं होतं की, 'मला स्वतःवर विश्वास आहे. मी माझ्या आयुष्यासोबत समझौता केला नाही. माझ्यावर जो काही दबाव टाकला गेला त्याला मी बळी पडली नाही. मला तिकीटासाठी जास्त काम करावं लागलं नाही. ती माझ्या संघर्षाची मस्करी करत आहेत. ती स्वतः एक सॉफ्ट पॉर्न स्टार आहे. ती स्वतःच्या अभिनयासाठी ओळखली जात नाही.' कंगनाच्या या वादग्रस्त वक्तव्यावरुन सर्व स्तरावर पडसाद उमटत आहेत.  

maharashtras first lady lieutenant general dr madhuri kanitkar reaction on kangana and urmila