दुसऱ्यांदा लग्नबंधनात अडकला मराठी अभिनेता; जाणून घ्या त्याच्या पत्नीबद्दल

'पुढचं पाऊल' या मालिकेत समीरची भूमिका साकारून घराघरात पोहोचलेला अभिनेता संग्राम समेळ याने दुसऱ्यांदा लग्नगाठ बांधली आहे. डान्सर श्रद्धा फाटकशी संग्रामचा विवाहसोहळा पार पडला असून त्याचे फोटो सोशल मीडियावर व्हायरल झाले आहेत. संग्रामचं हे दुसरं लग्न असून २०१६ मध्ये त्याने 'रुंजी' फेम पल्लवी पाटीलशी लग्न केलं होतं. मात्र या दोघांचा संसार फार काळ टिकला नाही. त्यानंतर आता संग्राम पुन्हा एकदा आयुष्याची नवी सुरुवात करत आहे. 

इचलकरंजी या ठिकाणी हा विवाहसोहळा संपन्न झाला. संग्रामच्या मित्रमैत्रिणींनी सोशल मीडियावर लग्नाचे फोटो शेअर करत या दोघांना शुभेच्छा दिल्या आहेत. नाटक, मालिका आणि चित्रपट अशा तिनही क्षेत्रात संग्रामने त्याच्या अभिनयाची छाप सोडली आहे. संग्रामने नाटकातून करिअरची सुरुवात केली. अभिनयाचा वारसा त्याला घरातूनच मिळाला. त्याचे वडील अशोक समेळ हे उत्तम लेखक व अभिनेते आहेत. 

हेही वाचा : नवा पाहुणा येताच सैफ-करीनाने घेतली आलिशान गाडी; किंमत वाचून व्हाल थक्क!

स्टार प्रवाह वाहिनीवरील 'ललित २०५' या मालिकेतही त्याने महत्त्वपूर्ण भूमिका साकारली होती. संग्रामला 'पुढचं पाऊल' या मालिकेतून खरी ओळख मिळाली. त्यानंतर त्याने 'एकच प्याला' या नाटकातही काम केलं. याशिवाय विकी वेलिंगकर, स्विटी सातारकर, ब्रेव्ह हार्ट या चित्रपटांतही त्याने भूमिका साकारल्या.