Michael Jackson ला पडली होती बप्पीदांच्या आवाजाची भुरळ, 'जिम्मी जिम्मी' गाणे आवडीचे

लोकप्रिय संगीतकार आणि गायक बप्पी लाहिरी(६९) यांचे आज निधन झाले. ८० च्या दशकात त्यांनी अनेक लोकप्रिय गाणी (Songs) निर्माण करून आपली ओळख तयार केली. बप्पी लाहिरी यांनी बंगाली चित्रपट दादू(१९७२) पासून आपल्या करियरची सुरूवात केली. शिकारी (१९७३) या चित्रपटापासून हिंदी चित्रपटाला त्यांनी संगीत दिले. त्यानंतर त्यांनी मागे वळून पाहिलेच नाही. ताहिर हुसैन यांच्या जख्मी(१९७५) या हिंदी चित्रपटातील गाणी तर लोकांच्या पंसतीस उतरली. त्यांची डिस्को म्युझिक असलेली गाणी जगभरातल्या लोकांना आवडली. जगप्रसिद्ध गायक मायकल जॅक्सनही त्यांच्या गाण्याचा चाहता होता.

स्वत: बप्पी लाहिरी यांनीच कपील शर्मा शोमध्ये याचा खुलासा केला होता. मायकल जॅक्सनने बप्पी दांची गाणी ऐकली होती. १९९६ साली मायकल जॅक्सन शो साठी पहिल्यांदाच भारतात आला होता. तेव्हा मायकल अनेकांना वैयक्तिक भेटला होता. मी पण तिथेच बसलो होतो. त्याची नजर माझ्या गळ्यातल्या गणपतीच्या सोन्याच्या साखळीवर पडली. त्याला ती खूप आवडली. मायकलने माझे नाव विचारले. मी लगेच माझे नाव सांगून डिस्को डान्सर गाणे सुरू करणार होतो पण इतक्यात तो म्हणाला, मला तुझे 'जिम्मी जिम्मी' गाणे खूप आवडते. त्यावेळी मला खूप आनंद झाला. एवढा मोठा माणूनस मला आणि माझ्या गाण्यांना चांगल्या प्रकारे लक्षात ठेवतो हेच सुखावह होते. असेही बप्पीदांनी सांगितले.