शाहिद कपूरच्या लहानग्यांनी असा साजरा केला प्रजासत्ताक दिन;सविस्तर वाचा

शाहिद कपूरनं(Shahid Kapoor) आई-वडिलांच्या संमतीने रीतसर अरेंज्ड मॅरेज केलं ते दिल्लीच्या मीरा राजपूतशी(Mira Rajput). त्या दोघांच्या कुटुंबाचे अध्यात्मिक गुरू एक. त्यामुळे सत्संगाच्या निमित्तानं यांची कुटुंब अनेकदा भेटायची त्यातूनच शाहिदसाठी मीराच योग्य असं पंकज कपूर यांना वाटले अन् त्यांनी आपल्या मुलाचे लग्न तिच्याशी लावून दिले. मीरा आणि शाहिदमध्ये वयाचं तेरा वर्षाचं अंतर असूनही ती खूप समजूतदार आहे असं अभिनेत्याने अनेकदा आपल्या मुलाखतींच्या माध्यमातून सांगितले आहे. पण खरंतर त्या दोघांच्या लग्नानंतर मीराने अनेकदा तिच्या वागणुकीतून,पोस्टच्या माध्यमातून आपल्या समजूतदारपणाची झलक दिलीच आहे. मीरा सोशल मीडियावर चांगलीच सक्रिय असते.

ती अनेकदा आपल्या नवऱ्यासोबतचे,मुलांसोबतचे फोटो,व्हिडीओ पोस्ट करीत असते. पण मेकअप संदर्भातल्याही टीप्स देणाऱ्या तिच्या पोस्ट चाहत्यांची वाहवा मिळवतात. मीरानं स्वतःला बॉलीवूडच्या लॅमलाइटपासून व्यवस्थित लांब ठेवलं आहे. ती तिचा फॅमिली टाईम व्यवस्थित एन्जॉय करताना दिसते. आज प्रजासत्ताक दिनीही तिने आपल्या मुलांविषयी,स्वतःच्या बालपणाविषयीच्या काही खास गोष्टी सांगणारी पोस्ट शेअर केली आहे. तिनं त्या पोस्टमध्ये बालपणी प्रजासत्ताक दिन ती कसा साजरा करायची आणि आज आपण आपल्या मुलांकडे तो गुणांचा वारसा कसा सुपूर्द केला आहे याविषयी लिहिले आहे. आज भारताचा ७३ वा प्रजासत्ताक दिन.

आज अनेक सेलिब्रिटींनी प्रजासत्ताक दिनाविषयीच्या पोस्ट शेअर केल्या आहेत. मीरा राजपूतनेही सकाळी प्रजासत्ताक दिनाच्या परेडचा आनंद मुलांसोबत कसा घेतला हे सांगताना टी.व्ही स्क्रीनवर सुरू असलेल्या परेडचा फोटो शेअर केला आहे. या दिवशी आर्मीत असलेल्या आपल्या आजोबांची खूप आठवण येत आहे असंही ती म्हणाली. ती लहान असताना आजोबा कसे यादिवशी त्यांना सकाळी उठवायचे आणि परेड पहायला टी.व्ही समोर बसवायचे आणि तो शिरस्ता आपण आजतागायत पाळत आहोत असंही तिनं पोस्टमध्ये लिहिलं आहे. मिशा आणि झेनने आपल्यासोबतच सकाळी लवकर उठून प्रजासत्ताक दिनाची परेड पाहत राष्ट्रगीतही म्हटले अशीही माहिती मीरानं त्या पोस्टमध्ये लिहिली आहे.