Miss India 2022: कर्नाटकची 21 वर्षीय सिनी शेट्टी बनली 'मिस इंडिया 2022'

ग्लॅमर इंडस्ट्रीतच नाही अगदी सर्वसामान्यांमध्येही या दिवसाची,या क्षणाची चर्चा रंगताना दिसते. तो क्षण,तो दिवस अखेर आला आणि फेमिना 'मिस इंडिया वर्ल्ड 2022' च्या विजेतीची रविवारी 3 जुलैच्या रात्री उशिरा घोषणा करण्यात आली. भारताला या वर्षीची आपली नवीन ब्यूटी क्वीनं अखेर मिळाली. कर्नाटकच्या सिनी शेट्टीला मुंबईमधील JIO वर्ल्ड कन्वेंशन सेंटरमध्ये फेमिना 'मिस इंडिया वर्ल्ड'चा मानाचा मुकूट घातला गेला. शेट्टी 21 वर्षाची आहे. तिचा जन्म मुंबईचाच. पण ती कर्नाटकची राहणारी आहे. अकाऊंट आणि फायनान्समध्ये तिनं डिग्री घेतली आहे. आणि आता ती साएफए चे देखील शिक्षण घेत आहे. भरनाट्यमचे शास्त्रशुद्ध शिक्षण देखील ती घेत आहे.(Femina Miss india 2022- Sini Shetty)

'मिस इंडिया वर्ल्ड 2022' स्पर्धेत राजस्थानच्या रुबल शेखावनं फर्स्ट रनर अपचा खिताब जिंकला आहे. रुबल राजस्थानच्या शाही घराण्यातून असल्याचं बोललं जात अहे. रुबलचं म्हणणं आहे की जिंकण्यापेक्षा आपली प्रगती खूप महत्त्वाची असते. आपला आत्मविश्वास दांडगा असल्याचं ती म्हणाली आहे. तिला नृत्य,अभिनय,चित्रकला या कलांमध्ये आवड असून,बॅडमिंटनही ती उत्तम खेळते. या स्पर्धेत उत्तर प्रदेशची शिनाता चौहान सेंकेंड रनर अप ठरलेली आहे.

रविवारी संध्याकाळी 'फेमिना मिस इंडिया 2022' च्या भव्य-दिव्य अशा शो मध्ये ३० राज्यांच्या विनर्सना परिक्षक आणि जगासमोर सादर केलं गेलं. फॅशन डिझायनर अभिषेक शर्माच्या रिसॉर्ट वियर कलेक्शननं डिझाईन केलेले कपडे त्या सर्व सौंदर्यवतींनी परिधान केले होते. वीएलसीसी 'मिस इंडिया 2022' चा ग्रॅंड फिनाले कलर्स एचडी वाहिनीवर 17 जुलै रोजी दुपारी १२ आणि संध्याकाळी ५ वाजता.आपण पाहू शकता.