सिद्धार्थ-मितालीची लग्नानंतरची पहिली धुळवड; पाहा फोटो

मराठीतील लोकप्रिय अभिनेता सिद्धार्थ चांदेकर आणि अभिनेत्री मिताली मयेकर २४ जानेवारी २०२१ रोजी लग्नबंधनात अडकले. पुण्यातील ढेपे वाडा या ठिकाणी अत्यंत पारंपरिक पद्धतीने या दोघांचा विवाहसोहळा पार पडला. देशभरात धुळवड साजरी होत असताना सिद्धार्थ-मितालीसुद्धा लग्नानंतरची पहिली धुळवड साजरा करत आहेत. यानिमित्ताने मितालीने सोशल मीडियावर सिद्धार्थसोबतचे फोटो पोस्ट केले आहेत. कोरोनाचं सावट असल्याने या दोघांनी घरातच ही पहिली धुळवड साजरी केली. 

'लग्नानंतरची पहिली धुळवड, घरात बसून खेळलेली पहिली धुळवड. हेही बदलेल. पण त्यासाठी आज, उद्या, आणखी काही दिवस घरातच थांबावं लागेल, तेवढं करुया. सर्वांना होळीच्या शुभेच्छा', असं कॅप्शन मितालीने या फोटोंना दिलं आहे. त्यासोबतच पोस्टच्या शेवटी मितालीने मजेशीर ओळ लिहिली आहे. सिद्धार्थच्या फोटोला अनुसरून मितालीने लिहिलं की, 'जेव्हा मी म्हणते, सिद्ध्या माझं डोकं खातो. तेव्हा ते खरं असतं. तुम्हाला पुरावा हवा असेल तर दुसरा फोटो पाहा.' मितालीच्या या फोटोवर अनेकांनी तिला शुभेच्छा दिल्या आहेत. 

हेही वाचा : रितेश-जेनेलियाचं 'बॉलिवूड स्टाइल' होळी सेलिब्रेशन; पाहा व्हिडीओ

अशी सुरु झाली दोघांची प्रेमकहाणी
एका मालिकेच्या सेटवर सिद्धार्थ-मितालीची पहिल्यांदा भेट झाली. या भेटीचं रुपांतर हळूहळू मैत्रीत आणि नंतर प्रेमात झालं. २०१७ मध्ये सिद्धार्थने मितालीच्या वाढदिवसानिमित्त एका सरप्राइज पार्टीचं आयोजन केलं होतं. या पार्टीत सिद्धार्थने तिला लग्नासाठी प्रपोज केलं. त्यानंतर काही महिने एकमेकांना डेट केल्यानंतर दोघांनी लिव्ह इन रिलेशनशिपचा निर्णय घेतला. जवळपास दोन वर्ष सिद्धार्थ-मिताली लिव्ह इनमध्ये राहिले. २०१९ मध्ये या दोघांचा साखरपुडा पार पडला. २०२० मध्ये ही जोडी लग्नबंधनात अडकणार होती. मात्र कोरोना महामारी आणि लॉकडाऊनमध्ये जानेवारी २०२१ मध्ये या दोघांनी लग्नगाठ बांधली.