व्हिडीओ: ‘मनी हाइस्ट’मधल्या ‘इन्स्पेक्टर रकेल’ने गायलं सलमानचं ‘चुनरी चुनरी’ गाणं

मुंबई- ‘मनी हाइस्ट’ ही वेब सीरिज अनेकांच्या पसंतीस पडत आहे. मूळ स्पॅनिश भाषेत असलेल्या या सीरिजने पटकथेच्या जोरावर संपूर्ण जगाचं लक्ष वेधून घेतलंय. या सीरिजमधील कलाकारांचं बॉलिवूड कनेक्शन अनेकदा पाहायला मिळालं. आता त्यात इन्स्पेक्टर रकेलची भूमिका साकारणारी अभिनेत्री इतझियार इत्योनोचा बॉलिवूड गाणं गातानाचा व्हिडीओ व्हायरल होत आहे.

हे ही वाचा: बॉलिवूडच्या पार्ट्यांमध्ये जाणं का टाळतो अक्षय कुमार? केला स्वतःच खुलासा    

‘शोशा’ या कार्यक्रमात इतझियारने बॉलिवूड डान्स प्रचंड आवडत असल्याचं सांगितलं. त्याचसोबत तिने सलमान खान आणि सुश्मिता सेन यांच्यावर शूट झालेलं ‘चुनरी चुनरी’ हे गाणंसुद्धा गायलं. इतकंच काय तर बॉलिवूडमधल्या सिनेमात काम करायची इच्छा देखील तिने व्यक्त केलीये. नुकतंच सुश्मिता सेनने हा व्हिडिओ पोस्ट करत त्याला 'ये बात' असं कॅप्शन देखील दिलंय. या सीरिजमधल्या कलाकार हे त्यांनी साकारलेल्या भूमिकांमुळे आज जगभरामध्ये प्रसिद्ध झाले आहेत. 

या व्यक्तीरेखांपैकी एक म्हणजे नैरोबी. सर्वांची काळजी घेणारी, सर्वांना समजून घेणारी नैरोबी पडद्यावर साकारणारी अल्बा फ्लोरेसचे खूप चाहते आहेत. ‘व्हाइसेंटे फेरेर’ या स्पॅनिश सिनेमामध्ये अल्बाने आंध्रप्रदेशमधील एका ग्रामीण भागातील महिलेची भूमिका साकारली होती. या सिनेमामध्ये अल्बाने साकारलेल्या भूमिकेचे नाव शामिरा असं होतं. यामध्ये अल्बा अगदी एखाद्या दाक्षिणात्य कलाकाराप्रमाणे डायलॉगबाजी करताना दिसतेय.

‘मनी हाइस्ट’ ही नेटफ्लिक्स या ओटीटी प्लॅटफॉर्मवरील ही सगळ्यात हिट ठरलेल्या वेब सीरिजपैकी एक आहे. स्वत:कडे गमावण्यासारखं काहीच नसलेल्या आठ जणांना एकत्र आणून ‘प्रोफेसर’ चोरीचा मोठा प्लान आखतो. मूळ स्पॅनिश भाषेत असलेल्या या सीरिजचं भाषांतर करून ती नेटफ्लिक्सवर रिलीज करण्यात आली. नुकतीच या सीरिजच्या पाचव्या सिझनची घोषणा देखील करण्यात आली आहे. तेव्हा चाहते या आगामी सिझनची मोठ्या आतुरतेने वाट पाहत आहेत. 

money heists lisbon sings salman khans chunari chunari song