"काही दमच नाही रे आरोपांमध्ये"; सहकलाकारांच्या तक्रारीवर किरण मानेंची नवी पोस्ट

सोशल मीडियावर राजकीय भूमिका घेतल्याने अभिनेते किरण माने (Kiran Mane) यांना स्टार प्रवाहवरील (Star Pravah) 'मुलगी झाली हो' (Mulgi Zali Ho) या मालिकेतून काढून टाकल्याचं बोललं जात असतानाच मालिकेचे दिग्दर्शक, काही कलाकार आणि वाहिनीने हा दावा खोडून काढत किरण माने यांना त्यांच्या गैरवर्तणुकीमुळेच मालिकेतून काढल्याचं सांगितलं. या प्रकरणाचा उगीच राजकीय रंग देण्यात आला, अशी प्रतिक्रिया त्यांनी दिली. मात्र सेटवर मी कोणतीही गैरवर्तणूक केली नाही, असं मानेंनी स्पष्ट केलं आहे. मालिकेच्या प्रॉडक्शन हाऊसविरोधात कोर्टात लढणार असल्याचं त्यांनी स्पष्ट केलं. याविषयी त्यांनी फेसबुकवरही पोस्ट लिहिली आहे. घडलेल्या घडामोडींचा उल्लेख करत त्यांनी वाहिनी आणि कलाकारांच्या आरोपांवर उपरोधिक उत्तर दिलं आहे.

किरण मानेंचं स्पष्टीकरण-

"मी सेटवर गैरव्यवहार केला नाही. जर मी गैरवर्तणूक करत होतो, तर कलाकार का गप्प होते? ही वेगळीच स्क्रीप्ट लिहिली जात आहे. अशा गोष्टींना मी घाबरत नाही. माझ्या राजकीय पोस्टमुळेच मला मालिकेतून काढण्यात आलं आहे. मालिकेच्या प्रॉडक्शन हाऊसविरोधात मी कोर्टात लढणार. माझ्या नावाची बदनामी सुरू आहे. शर्वणी पिल्लई आणि सविता मालपेकर या माझ्या बहिणी आणि आईसारख्या आहेत. एवढे दिवस त्यांनी माझा त्रास का सहन केला? मी कोणत्याही महिलेशी गैरवर्तन केलं नाही. याविरोधात मी शेवटपर्यंत लढा देणार, मला मालिकेत परत नाही घेतलं तरी चालेल", अशी प्रतिक्रिया मानेंनी दिली.

कलाकारांचे आरोप-

याबाबत दिग्दर्शक सचिन देव म्हणाले, की अभिनेते किरण माने यांची सेटवरील वागणूक बरोबर नव्हती. त्यांना प्रॉडक्शन हाऊसकडून तीन वेळा समज देण्यात आली होती. तरीही त्यांनी आपली वागणूक सुधारली नाही. त्यामुळे त्यांना मालिकेतून काढण्यात आलं. कोणत्याही राजकीय पक्षाच्या दबावाखाली किंवा राजकीय मत समाजमाध्यमांवर मांडले म्हणून काढण्यात आलेलं नाही. अभिनेत्री शर्वाणी पिल्ले म्हणाल्या, की किरण माने यांची बोलण्याची आणि वागण्याची पद्धत बरोबर नव्हती. आपल्यामुळेच ही मालिका चालते, असा टेंभा वारंवार ते मिरवत होते. त्यांच्या अशा गैरवर्तणुकीमुळेच त्यांना काढण्यात आले आहे. परंतु त्यांनी या गोष्टीला राजकीय रंग दिला आहे. ज्येष्ठ अभिनेत्री सविता मालपेकर यांनीही शर्वाणी पिल्ले आणि सचिन देव यांच्या प्रतिक्रियेला दुजोरा दिला आहे.