'आई कुठे काय करते'चा TRP घसरला; 'ही' मालिका ठरली नंबर १

स्टार प्रवाह वाहिनीवरील 'आई कुठे काय करते' (Aai Kuthe Kay Karte) ही मालिका टीआरपीच्या शर्यतीत नेहमीच अग्रस्थानी असते. मात्र गेल्या काही आठवड्यांपासून या मालिकेचा टीआरपी कमी झाल्याचं पहायला मिळत आहे. नेहमीच पहिल्या स्थानी असणारी ही मालिका आता थेट चौथ्या क्रमांकावर घसरली आहे. त्यामुळे मालिकेतील लग्नसोहळा विशेष एपिसोड्स प्रेक्षकांना आवडले नसल्याचं स्पष्ट होतंय. टीआरपीच्या यादीत सलग दुसऱ्या आठवड्यात 'रंग माझा वेगळा' या मालिकेने बाजी मारली आहे. ही मालिका पुन्हा एकदा पहिल्या क्रमांकावर आली आहे. तर दुसरा क्रमांक 'स्टार प्रवाह धुमधडाका २०२२' या भागाने पटकावला आहे. (TRP Report)

जयदीप आणि गौरीची मालिका 'सुख म्हणजे नक्की काय असतं' ही तिसऱ्या स्थानी आहे. तर 'मुलगी झाली हो' ही मालिका गेल्या दोन आठवड्यांपासून पाचव्या क्रमांकावर आहे. 'फुलाला सुगंध मातीचा' ही मालिका सातव्यावरून सहाव्या क्रमांकावर आली आहे. तर 'माझी तुझी रेशीमगाठ' ही श्रेयस-प्रार्थनाची मालिका आठव्यावरून सातव्या क्रमांकावर आली आहे. 'ठिपक्यांची रांगोळी' ही मालिका आठव्या क्रमांकावर आहे.

नवव्या स्थानावर 'स्वाभिमान: शोध अस्तित्वाचा' ही मालिका आहे. तर गेल्या आठवड्यात नवव्या क्रमांकावर असलेली 'येऊ कशी तशी मी नांदायला' ही मालिका दहाव्या क्रमांकावर गेली आहे. यंदाच्या आठवड्यात 'देवमाणूस' या मालिकेला पहिल्या दहामध्ये स्थान मिळू शकलं नाही. नव्या कथेसह या मालिकेचा दुसरा सिझन प्रेक्षकांच्या भेटीला आला आहे. मात्र ही कथा प्रेक्षकांना फारशी रुचत नसल्याचं दिसत आहे.