'मुलांना ट्रिपला थंड हवेच्या ठिकाणी जरुर न्या पण..'; प्रवीण तरडेचा मोलाचा सल्ला

महाराष्ट्रातील गडकिल्ले म्हणजे राज्याच्या स्वाभिमानाचा इतिहास आहे. या गडकिल्ल्यांमुळे छत्रपती शिवाजी महाराजांच्या प्रेरणादायी जीवनाची ओळख नवीन पिढीला सातत्याने होत असते. पालकांनी आवर्जून आपल्या मुलांना या गडकिल्ल्यांचा आणि छत्रपती शिवाजी महाराजांचा इतिहास सांगावा, त्यांना आपल्या समृद्ध इतिहासाची ओळख करून द्यावी, असा सल्ला दिग्दर्शक प्रवीण तरडेनं दिला आहे. प्रवीण तरडेनं त्याच्या मुलासोबत काही फोटो फेसबुकवर पोस्ट केले आहेत. 

या फोटोंमध्ये प्रवीण तरडे सिंहगडावर बसून मुलाला 'श्रीमान योगी' ही कादंबरी वाचून दाखवताना दिसत आहेत. श्रीमान योगी ही छत्रपती शिवाजी महाराज यांच्या जीवनावरील ऐतिहासिक कादंबरी आहे. 'मुलांना ट्रिपला थंड हवेच्या ठिकाणी जरुर न्या, पण आपल्या बापजाद्यांनी जिथं त्यांचं गरम रक्त सांडलं त्या गडकिल्ल्यांवर न्यायला विसरू नका. तिथं बसून त्यांना शिवचरित्र वाचून दाखवा. आजची संध्याकाळ सिंहगडवर', असं त्यांनी या फेसबुक पोस्टमध्ये लिहिलं. 

हेही वाचा : 'तुम्ही एका ट्विटमुळे डगमगत असाल तर..'; तापसी पन्नूचा सणसणीत टोला

प्रवीण तरडेचा 'सरसेनापती हंबीरराव' हा चित्रपट लवकरच प्रेक्षकांच्या भेटीला येणार आहे. छत्रपती शिवाजी महाराज आणि छत्रपती संभाजी महाराज यांचे सरसेनापती होण्याचा बहुमान मिळवणारे हंबीरराव मोहिते यांचा जीवनप्रवास या चित्रपटात उलगडणार आहे. जून २०२० मध्ये हा चित्रपट प्रदर्शित होणार होता. मात्र लॉकडाउनमुळे या चित्रपटाच्या प्रदर्शनाची तारीख पुढे ढकलण्यात आली आहे.