'वरणभात लोन्चा' प्रदर्शनाआधीच वादात; महिला आयोगाचं प्रसारण मंत्रालयाला पत्र

मुंबई: महेश मांजरेकर दिग्दर्शित "वरण भात लोन्चा कोन नाय कोन्चा" या चित्रपटाची सध्या चर्चा सुरु आहे. मात्र, प्रदर्शित होण्याआधीच हा चित्रपट वादात अडकला आहे. या चित्रपटाचा ट्रेलर नुकताच रिलीज झाला असून त्या ट्रेलरवरुनच हा वाद सुरु झाला आहे. या ट्रेलरमधील काही दृश्यांवर आक्षेप घेण्यात आला आहे. राष्ट्रीय महिला आयोगाच्या प्रमुख रेखा शर्मा यांनी माहिती आणि प्रसारण मंत्रालयाला याबाबत पत्र लिहलंय.

आगामी मराठी चित्रपट "वरण भात लोन्चा कोन नाय कोन्चा" चे ट्रेलरवरुन हे पत्र त्यांनी लिहलंय. या ट्रेलरमधील थेट अशी लैंगिक दृश्ये सेन्सॉर करण्यासाठी पत्र लिहण्यात आलंय. सोशल मीडिया प्लॅटफॉर्मवर अल्पवयीन मुलांचा समावेश असलेल्या अशा लैंगिक सामग्रीच्या खुल्या प्रसारणाचा निषेध या पत्राद्वारे करण्यात आला आहे.

दिवंगत ज्येष्ठ नाटककार आणि पत्रकार जयंत पवार यांनी लिहिलेल्या ‘वरन भात लोन्चा नि कोन नाय कोन्चा’ या कथेवर हा सिनेमा आधारित आहे. महेश मांजरेकर यांनी या सिनेमाची पटकथा आणि दिग्दर्शन अशी दुहेरी जबाबदारी सांभाळली आहे. येत्या १४ जानेवारी रोजी हा सिनेमा प्रेक्षकांच्या भेटीला येणार आहे.