Raju Shrivastava : राजूचे कुटुंब पोहोचले गुरुद्वारात; सुनील पाल म्हणाला...

Raju Shrivastava Health Update लाफ्टर चॅम्पियन (Comedian) राजू श्रीवास्तवच्या (Raju Srivastav) उत्तम आरोग्यासाठी सर्वजण प्रार्थना करीत आहेत. आज सकाळी राजूच्या कुटुंबीयांनी एम्सजवळील गुरुद्वारात जाऊन प्रार्थना केली. ‘कुटुंबातील सदस्य एम्समध्ये आहेत. राजूभाईंची अवस्था आजही तशीच होती. काल प्रकृतीत काहीशी सुधारणा झाल्याचे डॉक्टरांनी सांगितले होते. देशातील लाखो लोक त्यांच्या आरोग्यासाठी प्रार्थना करीत असताना आम्हीही देवाकडे प्रार्थना करीत आहोत’, असे राजूच्या भावाचा मेहुणा प्रशांतने सांगितले.

राजूचा धाकटा भाऊ देखील दिल्लीतील रुग्णालयात दाखल आहे. सध्या त्यांच्यावर उपचार सुरू आहे. त्यांना राजू रुग्णालयात असल्याची माहिती कुटुंबीयांनी दिलेली नाही, असे प्रशांतने सांगितले. शुक्रवारी राजू श्रीवास्तवच्या प्रकृतीत काही सुधारणा झाल्याचे वृत्त आले होते. डॉक्टरांनी राजू श्रीवास्तवला औषधे दिल्यानंतर काही सकारात्मक चिन्हे दिसली आहेत. तो अजूनही व्हेंटिलेटरवर आहे. त्याचा मेंदू प्रतिसाद देत नाही आहे. राजू श्रीवास्तवच्या मेंदूवर उपचाराचा विशेष परिणाम होत नाही आहे.

राजू श्रीवास्तवच्या (Raju Srivastav) कुटुंबीयांनीही याबाबतची एक पोस्ट इन्स्टाग्रामवर शेअर केली आहे. या सर्व बातम्या केवळ अफवा असल्याचे कुटुंबीयांचे म्हणणे आहे. कुटुंबीयांनी निवेदनात लिहिले आहे की, ‘राजू श्रीवास्तव यांची प्रकृती स्थिर आहे. आम्ही त्याला लवकर बरे होण्यासाठी शुभेच्छा देतो. डॉक्टरांची टीम जबाबदारीने प्रकृतीची काळजी घेत आहे. तुमच्या अखंड प्रेम आणि पाठिंब्याबद्दल आभार. अफवा किंवा खोट्या बातम्यांकडे लक्ष देऊ नका. कृपया राजू श्रीवास्तव यांच्या आरोग्यासाठी प्रार्थना करा’

मोदी-योगींनी केली विचारपूस

राजू श्रीवास्तवला १० ऑगस्ट रोजी दिल्लीतील हॉटेलच्या जिममध्ये हृदयविकाराचा (Heart Attack) झटका आला होता. यानंतर त्याचे प्रशिक्षक दिल्लीतील एम्स रुग्णालयात घेऊन गेले होते. राजूच्या मुलीने सांगितले होते की, तिच्या मनावरही याचा मोठा प्रभाव पडला आहे. त्याचवेळी राजूचा भाऊ काजू श्रीवास्तवची पत्नी श्रेया हिने सांगितले की, पंतप्रधान नरेंद्र मोदी आणि उत्तर प्रदेशचे मुख्यमंत्री योगी आदित्यनाथ यांनी राजूची पत्नी शिखाकडून प्रकृतीची विचारपूस केली.

प्रकृतीत सुधारणा

राजू श्रीवास्तवच्या प्रकृतीत सुधारणा होत आहे. सुधारणा होण्याची गती कमी आहे. मात्र, सुधारणा होत आहे, अशी माहिती राजूच्या कुटुंबीयांकडून प्राप्त झाली आहे. लवकरच राजू बरा होईल, असे सुनील पाल म्हणाला.