रेमो डिसूजाला मिळाला हॉस्पिटलमधून डिस्चार्ज, सोशल मिडियावर पोस्ट करत म्हणाला...

मुंबई- बॉलीवूडचा प्रसिद्ध कोरिओग्राफर रेमो डिसूजाला मुंबईतील कोकिलाबेन हॉस्पिटलमधून डिस्चार्ज मिळाला आहे. रेमो पत्नी लिजेलसोबत शुक्रवारी दुपारीच त्याच्या घरी पोहोचला. गेल्या शुक्रवारी रेमोला अचानक हृदयविकाराचा झटका आल्यानंतर कोकिलाबेन हॉस्पिटलमध्ये दाखल करण्यात आलं होतं. रेमोची हार्ट सर्जरी झाली आहे. सर्जरी करुन त्याच्या हृदयातील ब्लॉकेजेस काढण्यात आले आहेत.   

हे ही वाचा: फोटोग्राफर्सला पाहून चिडलेल्या तैमुरने पाहा काय केलं.. 

कोरिग्राफर रेमो डिसूजाला सर्जरीनंतर आयसीयूमध्ये ठेवण्यात आलं होतं. त्याची पत्नी लिजेल या दरम्यान त्याची देखभाल करत होती. रेमोच्या तब्येतीत सुधारणा झाल्यानंतर त्याला आयसीयूमधून दुस-या रुममध्ये हलवण्यात आलं होतं. रेमोच्या अचानक तब्येत बिघडल्याने त्याच्या चाहत्यांमध्ये काळजीचं वातावरण होतं. सोशल मिडियावर अनेकजण त्याच्या तब्येतीसाठी प्रार्थना करत होते. त्यामुळे हॉस्पिटलमधून घरी परतल्यावर त्याने सोशल मिडियावर चाहत्यांसाठी एक खास पोस्ट केली आहे. 

रेमोने इंस्टाग्रामवर पोस्ट करत त्याच्या चाहत्यांचे आणि हितचिंतकांचे आभार मानले आहेत. त्याने लिहिलंय, तुम्हा सगळ्यांच प्रेम, प्रार्थना आणि आशिर्वादाने मी परत आलो आहे. सुंदर स्वागतासाठी गैबरियाल डिसूजा, एडनाइस आणि एडी रॉकवूड यांचे आभार आणि माझ्या सगळ्या मित्रांचे धन्यवाद. 

याआधी 'एबीसीडी २' आणि 'स्ट्रीट डान्सर ३ डी' सिनेमामध्ये रेमोसोबत काम करणा-या अभिनेता, डान्सर राघव जुयालने इंस्टाग्रामवर त्याच्या तब्येतीबाबच माहिती दिली होती. तसंच अभिनेते अमिताभ बच्चन यांनी सोशल मिडियावर रेमोच्या तब्येतीसाठी प्रार्थना केली होती. रेमोला हॉस्पिटलमध्ये भेटण्यासाठी श्रद्धा कपूर, पुनीत पाठक, धर्मेश यांसारखे सेलिब्रिटी देखील गेले होते.   

remo d souza discharged from hospital admitted after heart attack