'पवित्र रिश्ता २' फेम अभिनेत्याच्या वडिलांचं निधन; कोरोनाशी झुंज अपयशी

टेलिव्हिजनवरील प्रसिद्ध अभिनेता शाहीर शेखचे (Shaheer Sheikh) वडील शहनवाज शेख यांची कोरोनाशी झुंज अपयशी ठरली. त्यांना व्हेंटिलेटरवर ठेवण्यात आलं होतं. अखेर बुधवारी शहनवाज यांची प्राणज्योत मालवली. छोट्या पडद्यावरील अनेक कलाकारांनी सोशल मीडियाद्वारे त्यांना श्रद्धांजली वाहिली. एक दिवसापूर्वीच वडिलांची प्रकृती गंभीर असून त्यांना व्हेंटिलेटरवर ठेवण्यात आल्याची माहिती शाहीरने ट्विट करत दिली होती. 'माझे बाबा व्हेंटिलेटरवर आहेत. कोरोनाशी ते झुंज देत आहेत. त्यांच्या प्रकृतीसाठी प्रार्थना करा', असं ट्विट त्याने केलं होतं. (Covid 19)

'बिग बॉस' फेम अली गोणी, हिना खान यांसारख्या कलाकारांनी ट्विट करत सहवेदना व्यक्त केल्या. शाहीरने नोव्हेंबर २०२० मध्ये रुचिका कपूरशी लग्न केलं. गेल्या वर्षी सप्टेंबरमध्ये या दोघांना कन्यारत्न प्राप्त झालं.

शाहीर शेख सध्या 'पवित्र रिश्ता २' या मालिकेत भूमिका साकारत आहे. शाहीर आणि अंकिता लोखंडेच्या या मालिकेचा ट्रेलर नुकताच प्रदर्शित करण्यात आला. २८ जानेवारीपासून ही मालिका झी5 या ओटीटी प्लॅटफॉर्मवर प्रेक्षकांच्या भेटीला येणार आहे.

राज्यात बुधवारी दिवसभरात कोरोनाच्या ४३,६९७ रुग्णांची नोंद झाली. गेल्या २४ तासांत ४९ रुग्णांचा मृत्यू झाला. राज्यात नवीन रुग्णांपेक्षा कोरोनामुक्त झालेल्या रुग्णांची संख्या अधिक आहे. दिवसभरात ४६,५९१ रुग्ण कोरोनामुक्त झाले असून उपचाराधीन रुग्णांची संख्या २,६४,७०८ इतकी आहे.