'मला शिव्या खायला तयार राहावं लागणार आहे'; शशांक केतकरने असं केलं तरी काय?

मालिकांमधील लोकप्रिय अभिनेता शशांक केतकर याची सोशल मीडियावरील एक पोस्ट नुकतीच चर्चेत आली आहे. शशांकने इन्स्टाग्रामवर एक व्हिडीओ पोस्ट केला असून त्याच्या कॅप्शनमध्ये त्याने लिहिलं, 'मला शिव्या खायला तयार राहावं लागणार आहे.' यामागचं कारण म्हणजे शशांकची नवी मालिका. या मालिकेत तो पहिल्यांदाच नकारात्मक भूमिका साकारणार आहे. 

२०१३ मध्ये प्रेक्षकांच्या भेटीला आलेली 'होणार सून मी या घरची' ही मालिका प्रचंड गाजली. या मालिकेतून शशांक घराघरात पोहोचला आणि आता तरुणींच्या गळ्यातील ताईत असलेला 'श्री' म्हणजेच शशांक मालिकेत पुनरागमन करतोय. झी मराठी वाहिनीवरील 'पाहिले न मी तुला' या मालिकेत तो समरप्रताप या व्यक्तीची नकारात्मक भूमिका साकारतोय. या मालिकेत 'माझा होशील ना' या मालिकेतून घराघरात पोहोचलेला डॉ. सुयश पटवर्धन अर्थात आशय कुलकर्णी प्रमुख भूमिकेत आहे. तर त्यासोबत तन्वी मुंडले हा नवीन चेहरा प्रेक्षकांना पाहायला मिळणार आहे. शशांकने या मालिकेचा प्रोमो पोस्ट करत लिहिलं, 'कदाचित मला शिव्या खायला तयार राहावं लागणार आहे. एक अभिनेता म्हणून टेलिव्हिजनवर फार कमी वेळा असे एक्सपरिमेंट्स करायला मिळतात. या खतरनाक संधीसाठी झी मराठी, आदिनाथ कोठारे आणि उर्मिला कोठारे तुमचे खूप आभार.'

हेही वाचा : तमिळ सुपरस्टार अजित कुमारच्या चाहत्याची आत्महत्या 

मानसी आणि अनिकेतच्या अतूट प्रेमाची आणि विश्वासाची कथा या मालिकेत दाखवण्यात येणार आहे. या दोघांचं प्रेम लग्नबंधनात अडकण्याआधी समरच्या विक्षिप्त नजरेत येतं. तिथूनच मानसी आणि अनिकेतच्या आयुष्यातील ससेहोलपट सुरू होते. पाठीवर छुपे वार करणाऱ्या नीच प्रवृत्तीच्या समरला अनिकेत-मानसी कसे सामोरे जातील हे मालिकेत प्रेक्षकांना पाहायला मिळेल. ही मालिका १ मार्च पासून सोमवार ते शनिवार संध्याकाळी ७ वाजता झी मराठी वाहिनीवर प्रसारित होणार आहे.