शत्रुघ्न सिन्हा यांनी 'भाजप'ला नमवल्याचा आनंद सोनाक्षीच्या पोस्टमधनं दिसला

पश्चिम बंगालच्या आसनसोल लोकसभेच्या जागेसाठी तृणमुल क्रॉंगेसचे उमेदवार शत्रुघ्न सिन्हा (Shatrughan Sinha)यांच्या दणदणीत विजय झालेला आहे. त्यांनी भाजपाच्या अग्निमित्र पॉल यांना ३ लाख मतांच्या फरकानं हरवलं आहे. यामुळे शत्रुघ्न सिन्हा यांची मुलगी आणि अभिनेत्री सोनाक्षी सिन्हा(Sonakshi Sinha) हिनं आपल्या अधिकृत इन्स्टाग्राम अकाऊंटवर वडीलांच्या विजयाची बातमी देणारी पोस्ट करत इतक्या मोठ्या फरकानं वडील जिंकून आले म्हणून त्यांचं अभिनंदन करणारी पोस्ट केली आहे. सोनाक्षीनं पहिल्या पोस्टमध्ये वडील किती मतांनी विरोधी उमेदवारापेक्षा पुढे आहेत हे सांगताना ८४,००० मतांचा फरक सांगितला होता. तिनं 'yay' शब्द लिहीलेला एक स्टिकर तिथे पोस्टवर जोडला होता. सोनाक्षीनं ती पोस्ट भाऊ लव सिन्हा आणि वडील शत्रुघ्न सिन्हा यांना समर्पित केली आहे. तिनं त्या दोघांनाही आपलं प्रेरणास्थान मानलं आहे. आणि आसनसोलच्या लोकांचे आभारही मानले आहेत.

सोनाक्षीचा भाऊ लवने देखील वडीलांसाठी लिहीलेल्या पोस्टमध्ये म्हटलं आहे, ''मी माझ्या वडीलांच्या पक्षात नाही. पण मला माहिती आहे,माझ्या वडिलांनी अशा ठिकाणी विजय मिळवला आहे जिथे भाजपाचं अस्तित्व मिटवणं कठीणच नाही असंभव होतं. माझे वडील आपल्या आयुष्यात एका नव्या वाटेवरनं प्रवास करीत आहेत,आणि तिथं त्यांना विजय मिळणं हे खरंच अविश्वसनीय आहे. माझे वडील माझी प्रेरणा होते आणि कायम राहतील. मी आसनसोलचे नागरिक,तृणमुल कॉंग्रेसचे कार्यकर्ता,नेते आणि ममना बॅनर्जी यांचा आभारी आहे''.

सोनाक्षीनं आपल्या भावाची पोस्ट शेअर करीत लिहिलं आहे,''आणि विजेते आहेत...;''. आपल्या तिसऱ्या पोस्टमध्ये सोनाक्षीनं आपल्या वडीलांनी कसा रेकॉर्ड करणारा विजय मिळवला आहे यावर प्रकाशझोत टाकला आहे.

सोनाक्षीनं २०१० मध्ये सलमान खानसोबत 'दबंग' सिनेमातून बॉलीवूडमध्ये पदार्पण केलं होतं. यासाठी तिला पदर्पणाचा बेस्ट डेब्यू फिल्मफेअर पुरस्कारही मिळाला होता. त्यानंतर 'दबंग २' आणि 'दबंग ३' सिनेमातही ती दिसली होती. सोनाक्षीनं 'लुटेरा','बुलेट राजा','हिम्मतवाला','तेवर','अकिरा' सारख्या अनेक वेगळ्या धाटणीच्या सिनेमातूनही काम केलं आहे. लवकरच ती हुमा कुरेशीसोबतही एका सिनेमात दिसणार आहे. मराठी दिग्दर्शक आदित्य सरपोतदारच्या 'काकुडा' सिनेमातही ती दिसणार आहे. या सिनेमात सोनाक्षीसोबत रितेश देशमुख(Riteish Deshmukh) आणि साकिब सलीमही दिसणार आहेत.