'स्पायडर मॅन'समोर 'सूर्यवंशी'ही पडला फिका; पहिल्याच दिवशी धमाकेदार कमाई

'स्पायडर मॅन: नो वे होम' (Spider-Man: No Way Home) या चित्रपटाने पहिल्याच दिवशी धमाकेदार कमाई केली आहे. भारतात पहिल्याच दिवशी या चित्रपटाने ३३ कोटी रुपयांचा गल्ला जमवला आहे. २०२१ या वर्षात सर्वाधिक कमाईने सुरुवात करणारा हा चित्रपट ठरला आहे. अक्षय कुमारच्या 'सूर्यवंशी'लाही (Sooryavanshi) 'स्पायडर मॅन'ने मागे टाकलं आहे. 'सूर्यवंशी'ने पहिल्या दिवशी २६.२९ कोटी रुपयांची कमाई केली होती. फक्त 'सूर्यवंशी'च नाही तर २०१९ मध्ये प्रदर्शित झालेल्या 'अॅव्हेंजर्स: एंडगेम' (Avengers: Endgame) या चित्रपटाच्या भारतातील पहिल्या दिवसाच्या कमाईलाही 'स्पायडर मॅन'ने टक्कर दिली आहे. (Spider man box office collection)

मार्व्हल स्टुडिओज आणि सोनी पिक्चर्स यांच्या 'स्पायडर मॅन: नो वे होम' या चित्रपटात टॉम होलँड हा मुख्य भूमिकेत आहे. याशिवाय झेंडाया, बेनेडिक्ट कुंबरबॅच, विलेम डाफो, आल्फ्रेड मोलिना आणि जेमी फॉक्स यांच्याही भूमिका आहेत. 'बॉक्स ऑफिस इंडिया'ने दिलेल्या वृत्तानुसार, स्पायडर मॅनने मल्टिप्लेक्सेसमध्ये चांगली कमाई केली. कोरोना काळानंतर भारतात 'वकील साब' (तेलुगु) आणि 'मास्टर' (तामिळ) या चित्रपटांनंतर हा तिसरा सर्वोत्कृष्ट ओपनिंग करणारा चित्रपट ठरला आहे.

'स्पायडर-मॅन: नो वे होम' हा या वर्षी भारतात प्रदर्शित होणारा तिसरा मार्व्हल सुपरहिरो चित्रपट आहे. मार्व्हल स्टुडिओने शांग-ची आणि द लेजेंड ऑफ टेन रिंग्ज आणि इटर्नल्स प्रदर्शित केले आहेत. शांग-चीने ३.२५ कोटी रुपये, इटर्नल्सने ८.७५ कोटी रुपयांची कमाई केली होती. टॉमची मुख्य भूमिका असलेल्या 'स्पायडर मॅन'च्या या चित्रपटाला समिक्षकांकडूनही सकारात्मक प्रतिसाद मिळाला आहे.