Subhedar : सुभेदारांच्या घरातील लगीनघाई! तानाजी मालुसरेंच्या जीवनावरील चित्रपटाचा पोस्टर रिलीज

Subhedar - महाराजांच्या प्रत्येक मावळ्याने स्वराज्यासाठी सर्वस्वाचा त्याग केला. आयुष्यात फक्त एकच देव मानून कार्य करत राहिले, ते देव म्हणजेच छत्रपती शिवाजी महाराज. हिंदवी स्वराज्याच्या शूर मावळ्यांचे शौर्य जाणून घेताना त्यांच्या व्यक्तिगत आयुष्याचे पदर फार क्वचित चित्रपटातून पाहायला मिळतात.

नरवीर सुभेदार तानाजी मालुसरे हे तर शिवचरित्राच्या महान ग्रंथातील एक झळाळते सुवर्णपान! त्यांचे भावनिक आणि कौटुंबिक आयुष्य दाखवण्याचा प्रयत्न करत त्यांच्या शौर्याचे पराक्रमी पान उलगडणारा दिग्पाल लांजेकर लिखित आणि दिग्दर्शित ‘सुभेदार’ हा चित्रपट २५ ऑगस्ट रोजी प्रेक्षकांच्या भेटीला येत आहे.

''आधी लगीन कोंढाण्याचं, मग माझ्या रायबाचं'' अशी गर्जना करत मोहीम फत्ते करणाऱ्या या शूर योद्ध्याला त्यांच्या कुटुंबाने ही तितकीच मोलाची साथ दिली. हा भावनिक पदर ‘सुभेदार’ चित्रपटात पाहायला मिळणार आहे. आगामी ‘सुभेदार’ या चित्रपटातील एक देखणं पोस्टर नुकतंच प्रदर्शित झालं आहे. यात मालुसरे यांचं संपूर्ण कुटुंब पाहायला मिळतंय. त्यात त्यांची आई, पत्नी, भाऊ, वहिनी, मुलगा आणि सदैव खंबीर साथ देणारे शेलारमामा दिसत आहेत.

यातील सुभेदारांची भूमिका अभिनेता अजय पूरकर, तर त्यांच्या पत्नीची सावित्रीबाईंची भूमिका अभिनेत्री स्मिता शेवाळे यांनी साकारली आहे. धाकटा भाऊ सूर्याजी मालुसरेंच्या दमदार भूमिकेत अभिजीत श्वेतचंद्र, तर त्यांच्या पत्नीची म्हणजेच यशोदाबाईंची भूमिका शिवानी रांगोळे हिने साकारली आहे. मालुसरे कुटुंबीयांचा आधारवड असणाऱ्या शेलार मामांच्या भूमिकेत समीर धर्माधिकारी दिसत आहेत.