'चांगला हेतू असलेला एक तरी पक्ष मला दाखवा', सुमित राघवन भडकला

पुण्यातील शिवछत्रपती क्रीडा संकुलात घडलेल्या प्रकारावर अभिनेता सुमित राघवनने तीव्र नाराजी व्यक्त केली आहे. मंत्र्यांच्या गाड्यांचा ताफा अॅथलेटिक्स रेस ट्रॅकवर पार्क करण्यात आला होता. याप्रकरणी ट्विट करताना सुमितने सर्वच राजकीय पक्षांवर निशाणा साधला. 'महाराष्ट्र हे खेदजनक राज्य आहे', असं त्याने या ट्विटमध्ये म्हटलंय.

सुमित राघवनचं ट्विट-

'महाराष्ट्रातील कारभार हे खेदजनक आहे. कोविड प्रोटोकॉल्स, कायदा आणि सुव्यवस्था, करदाता यांच्यासाठी इथे शून्य आदर आहे. चांगल्या हेतूचा एक तरी राजकीय पक्ष मला दाखवा. नवी मुंबई विमानतळाच्या नावासाठी निषेध मोर्चा, दहिसर टोलनाक्यावर आरक्षणासाठी मोर्चा किंवा हे..' असं ट्विट त्याने केलंय.

नेमकं काय आहे प्रकरण?

पुण्यातील बालेवाडी परिसरात उभारल्या जाणाऱ्या आंतरराष्ट्रीय क्रीडा विद्यापिठाच्या कामकाजाचा आढावा घेण्यासाठी राष्ट्रवादी काँग्रेसचे अध्यक्ष शरद पवार, राज्याचे क्रीडामंत्री सुनील केदार आणि राज्यमंत्री अदिती तटकरे हे शिवछत्रपती क्रीडा संकुल इथं दाखल झाले होते. यावेळी त्यांच्या गाड्यांचा ताफा अॅथलेटिक्स रेस ट्रॅकवर उभ्या करण्यात आल्या होत्या. कोट्यवधी रुपये खर्च करून तयार केलेल्या या अॅथलेटिक्स ट्रॅकवर खेळाडूंच्या सरावाव्यतिरिक्त इतर कोणाला पायी चालण्याचीही परवानगी नसते.

महाराष्ट्र क्रीडा विभागाकडून माफीनामा

'शरद पवारांना पायाच्या त्रासामुळे चालण्यास अडचण होऊ नये म्हणून सिमेंटेड ट्रॅक्सवर गाड्या पार्क करण्याची परवानगी देण्यात आली होती. मात्र दुर्दैवाने त्या गाड्या ट्रॅक्सवर पार्क करण्यात आल्या. याप्रकरणी मी माफी मागतो आणि भविष्यात पुन्हा अशी चूक घडणार नाही याचं आश्वासन देतो', असं महाराष्ट्र क्रीडा आयुक्त ओमप्रकाश बकोरिया 'एएनआय'शी बोलताना म्हणाले.

क्रीडा व युवक कल्याण मंत्री सुनील केदार यांनीही या घटनेची गंभीर दखल घेतली असून या पुढे असे प्रकार होणार नाही, यासाठी त्यांनी प्रशासनाला कडक सूचना दिल्या आहेत. ॲथलेटिक्स ट्रॅक तसेच मैदानावरही कोणत्याही प्रकारची वाहने जाणार नाही, याचीही काळजी घेण्यास केदार यांनी बजावले आहे.