Bigg Boss Marathi: हे कलाकार दिसणार बिग बॉसच्या घरात?

Bigg Boss marathi season 4 : 'बिग बाॅस मराठी' हा एक लोकप्रिय कार्यक्रम आहे. त्याचे चौथे पर्व लवकरच सुरु होणार आहे. नुकतेच कलर्स मराठीने एक व्हिडिओ शेअर करत लवकरच बिग बाॅस प्रेक्षकांच्या भेटीला येणार असल्याचे सांगितले. या पर्वाचे सूत्रसंचालन महेश मांजरेकर करणार का, किंवा नेमकं कोण करणार यावरून सुरू झालेल्या चर्चा ताज्या असतानाच आता यंदाच्या पर्वात कोणते कलाकर सहभागी होणार याची चर्चा सुरू झाली आहे. एका माध्यमाने सहभागी होणाऱ्या दहाहून अधिक कलाकारांची संभाव्य यादी जाहीर केली आहे.

मराठी मालिका विश्वात 'बिग बॉस' ही संकल्पना रुजेल का याबाबत अनेकांना शंका होती. पण काही वर्षांपूर्वी बिग बॉस मराठीत सुरु झाला आणि प्रेक्षकांनी अक्षरशः डोक्यावर घेतलं. दैनंदिन मालिकांमधील काल्पनिक कुरघोड्या पाहण्यापेक्षा एका घरात बंद असलेल्या लोकांमध्ये घडणाऱ्या खऱ्या कुरघोड्या प्रेक्षकांच्या चांगल्याच पसंतीस पडल्या. बघता बघता या मालिकेचे तीन सीजन झालेही आणि आता चौथा सीजन कधी येणार याची उत्सुकता प्रेक्षकांना लागली आहे. (bigg boss marathi season 4) विशेष म्हणजे कोणते कलाकार यंदाच्या पर्वात असणार याकडे सर्वांचे लक्ष लागले आहे. काहींनी याबाबत तर्क वितर्क देखील सुरू केले आहेत. अशातच एका माध्यमाने संभाव्य कलकरांची नावे जाहीर केली आहेत.

या नावांमध्ये काही मोठ्या कलाकारांचा सहभाग आहे तर काही कायमच चर्चेत असणारे कलाकार आहेत. समोर आलेल्या माहिती नुसार अभिनेत्री अलका कुबल, शुभांगी गोखले, स्वराज्य रक्षक फेम प्राजक्ता गायकवाड, देवमाणूस फेम नेहा खान, सोनल पवार, रुचिरा जाधव, शर्वरी लोहकारे, दीप्ती लेले, गायिका कार्तिकी लेले, 'मुलगी झाली हो' मालिकेवरून वादात अडकलेला अभिनेता किरण माने, 'तुझ्यात जीव रंगला' फेम हार्दिक जोशी, ओंकार शिंदे, अनिकेत विश्वासराव, 'लागीर झालं जी' मधील निखिल चव्हाण, यशोमान आपटे, 'रात्रीस खेळ चाले' मालिकेतील अण्णा म्हणजेच माधव अभ्यंकर हे कलाकार संभाव्य यादीत आहेत. हे कलाकार जर खरच 'बिग बॉस मराठी'च्या घरात आले तर मात्र प्रेक्षकांसाठी मोठी पर्वणी ठरणार आहे.