Vaishali Thakkar Suicide: वैशालीचा आरोपी राहुलची चार दिवसांच्या पोलिस कोठडीत रवानगी...

प्रसिद्ध टीव्ही अभिनेत्री वैशाली ठक्कर हिने 15 ऑक्टोबर रोजी इंदूरच्या राहत्या घरी पंख्याला गळफास लावून आत्महत्या केली. तिच्या आत्महत्येने टिव्ही इंडस्ट्रीसह सर्वांनाच मोठा धक्का बसला आहे.  तिच्या आत्महत्येनंतर पोलिसांच्या हाती लागलेल्या डायरीने अनेकांची पोल खोलली.

 वैशालीने तिच्या सुसाइड नोटमध्ये राहुलवर गंभीर आरोप केले होते. तिने म्हटले होते की, मैत्रीचा गैरफायदा घेत राहुलने तिचे काही फोटो क्लिक केले आणि ते फोटो तिच्या प्रियकराला पाठवून तिचे लग्न मोडले. तिला आत्महत्येला प्रवृत्त करणाऱ्याविषयी तिने यात उल्लेख केला होता. त्या आधारे पोलिसांनी आरोपींना अटक केली आणि कोर्टासमोर हजर केले.

 वैशालीचा माजी प्रियकर राहुल नवलानी याचे नाव समोर आल्यानतंर त्याचा शोध पोलिसांनी सुरु केला होता. राहुल गेल्या अडीच वर्षांपासून तिचा छळ करत असल्याचे पोलिस तपासात उघड झाले आहे.  तिने सुसाईड नोटमध्ये तिच्या मृत्यूसाठी राहुलला जबाबदार धरले होते. वैशालीने आत्महत्या केल्यानंतर राहुल फरार झाला होता. मात्र पोलिसांनी तीन दिवसांनी शोध घेतल्यानंतर छापा टाकून अखेर १९ ऑक्टोबर रोजी त्याला अटक केली. पोलिसांनी राहुलला इंदूर न्यायालयात हजर केले.

  पोलिसांनी राहुलला ऑनलाइन कोर्टात हजर करण्याचा प्रयत्न केला होता, मात्र पोलिसांना कोर्टाने फटकारले. त्यानंतर 10 मिनिटांत राहुलला न्यायालयात हजर करण्यात आले. पोलिसांनी राहुलच्या 10 दिवसांच्या पोलिस कोठडीची मागणी कोर्टाकडे केली, मात्र कोर्टाने ही मागणी फेटाळून लावत राहुलला चार दिवसांची पोलिस कोठडी सुनावली.  आता राहुलविरुद्ध पुरावे सादर करण्यासाठी चार दिवसांचा वेळ कोर्टाने दिला आहे.