'जय भीम' चित्रपटातील दृश्यावरून वाद; प्रकाश राज यांच्यावर होतेय टीका

'जय भीम' Jai Bhim हा चित्रपट नुकताच ओटीटी प्लॅटफॉर्मवर प्रदर्शित झाला असून या चित्रपटातील एका दृश्यावर नेटकऱ्यांनी आक्षेप घेतला आहे. या दृश्यामुळे अभिनेते प्रकाश राज Prakash Raj यांना ट्रोल करण्यात येत असून सोशल मीडियावर हा व्हिडीओ व्हायरल होत आहे. चित्रपटातील दृश्यामध्ये हिंदीत संवाद साधल्यामुळे ते एका तमिळ व्यक्तीच्या कानशिलात लगावतात. याच दृश्यावर प्रेक्षकांनी नाराजी व्यक्त केली आहे. 'जय भीम' या चित्रपटात प्रकाश आणि सूर्या यांच्या मुख्य भूमिका आहेत. अॅमेझॉन प्राइम व्हिडीओवर हा चित्रपट नुकताच प्रदर्शित झाला आहे. या दृश्यामुळे सोशल मीडियावर सध्या या चित्रपटाची जोरदार चर्चा आहे.

टी. एस. गगानवेल यांनी या चित्रपटाचं दिग्दर्शन केलं असून आदिवासी लोकांवर होणाऱ्या अन्यायाची कथा यामध्ये दाखवण्यात आली आहे. तमिळ भाषेतील हा चित्रपट सत्य घटनेवर आधारित आहे. चित्रपटातील एका दृश्यामध्ये प्रकाश राज हे एका व्यक्तीच्या कानशिलात लगावतात. मला का मारलं, असा प्रश्न त्याने विचारला असता 'तू हिंदीत का बोललास, तमिळ भाषेत बोल' असं प्रकाश राज खडसावतात. खरं तर चित्रपटात या दृश्याची काही गरज नव्हती, असं मत अनेकांनी मांडलं आहे. तर काहींनी प्रकाश राज यांचीही बाजू घेतली आहे. 'हा चित्रपट हिंदी भाषिकांविरुद्ध नाही, दृश्यावर टीका करण्यासाठी संपूर्ण चित्रपट पहा', असं काहींनी म्हटलंय.

१९९३ मध्ये तमिळनाडूमध्ये घडलेल्या घटनेवर या चित्रपटाची कथा आधारित आहे. यामध्ये सुर्या, प्रकाश राज यांच्यासोबतच राजीशा विजयन, लिजोमोल होसे, राव रमेश आणि के मनिकंदन यांच्या भूमिका आहेत.