या प्रकरणात नोरा फतेही, जॅकलिन फर्नांडिसचीही चौकशी
अभिनेत्री नोरा फतेही Nora Fatehi आणि जॅकलिन फर्नांडिस Jacqueline Fernandez यांची अंमलबजावणी संचालनालयाकडून ED होत असलेली चौकशी पाहून हे प्रकरण नेमकं काय आहे असा प्रश्न अनेकांना पडला आहे. २०० कोटींच्या मनी लाँड्रिंग प्रकरणात या दोघींची चौकशी होत आहे. याच प्रकरणात 'मद्रास कॅफे' Madras Cafe चित्रपटात भूमिका साकारलेली अभिनेत्री लीना मारिया पॉल Leena Maria Paul हिला दिल्ली पोलिसांच्या आर्थिक गुन्हे शाखेने सप्टेंबर महिन्यात अटक केली होती.
कोण आहे लीना मारिया पॉल?
लीना पॉलने शूजित सरकारच्या 'मद्रास कॅफे' चित्रपटात एका तमिळ बंडखोराची भूमिका साकारली होती. याशिवाय तिने काही चित्रपटांमध्ये छोट्या भूमिका साकारल्या आहेत. २०० कोटींच्या मनी लाँड्रिंग प्रकरणात लीनासह सुकेश चंद्रशेखर यांना न्यायालयीन कोठडी सुनावली होती. खंडणी प्रकरणात सुकेश चंद्रशेखरचं नाव उघड झाल्यानंतर लीनाविरोधात सबळ पुरावे असल्याचं पोलिसांनी स्पष्ट केलं. लीना ही सुकेशची गर्लफ्रेंड आहे. एआयडीएमकेचे निवडणूक चिन्ह मिळवून देण्याच्या आरोपाखाली सुकेश सध्या तिहार जेलमध्ये आहे.
लीनाने २००९ मध्ये 'रेड चिलीज' या चित्रपटातून आपल्या करिअरची सुरुवात केली आणि त्यानंतर 'हसबंड्स इन गोवा', 'कोबरा' आणि 'बिर्याणी'सारख्या चित्रपटांमध्ये तिने काम केले आहे. एका वृत्तानुसार, तिने बेंगळुरूमध्ये डेंटिस्टचे प्रशिक्षण घेतले होते, परंतु नंतर तिने सिनेसृष्टीत काम करण्यासाठी डेंटिस्टचे काम सोडले. लीनावर फोर्टीस हेल्थकेअरचे माजी प्रवर्तक शिविंदर मोहन सिंग यांची पत्नी अदिती सिंगला फसवण्यात सुकेशला मदत केल्याचा आरोप आहे. याआधीही ईडीने तिची अनेकदा चौकशी केली होती.
२०० कोटी घोटाळा प्रकरण काय आहे?
रेलिगेअर कंपनीचे प्रमोटर मलविंदर आणि शिविंदर सिंग यांना जेलमधून बाहेर काढण्यासाठी सुकेशने त्यांच्या पत्नींसोबत मिळून एक डील केली होती. यासाठी सुकेशने त्यांच्याकडून कोट्यवधी रुपये उकळले होते. मलविंदरची पत्नी जापना आणि शिविंदरची पत्नी अदिती यांनी याबाबत गुन्हे शाखेकडे तक्रार केली होती. पतींना कारागृहातून बाहेर काढण्याच्या नावाखाली कोट्यवधी रुपये उकळल्याची तक्रार त्यांनी केली होती.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.