माहेरचा झोका, यंदा सासरी झुलला... 

टेंभुर्णी (जि.जालना) -  मनस्वी आनंद देणाऱ्या श्रावणमासातील सण-उत्सवाला प्रारंभ झाला; मात्र यावर्षी कोरोनामुळे माहेरवाशिणींना सासर सोडता आले नाही. यामुळे माहेरची ओढ लागलेल्या महिलांना यंदा नागपंचमीचा उत्सव सासरीच साजरा करावा लागला. माहेरचा झोका यंदा सासरीच झुलावा लागला.

कोरोनामुळे हे वर्ष जुन्यापेक्षा अलग बनले. एसटी बंद, ठिकठिकाणी जिल्हा प्रवेशबंदी, ऑनलाइन परवानगी, शिवाय लेकराबाळांसह प्रवासादरम्यान विषाणूच्या संसर्गाची सतत वाटणारी भीती अशा वातावरणात इच्छा असूनही अनेकींना माहेरी जाता आलेले नाही.

हेही वाचा : दिवस येतील छान, घेऊ नका ताण

माहेरची ओढ लागलेल्या अशा लेकींना यावर्षी सासरीच नागपंचमी साजरी करावी लागली. यामुळे अनेकींनी माहेरी झुलायचा झुला यंदा सासरीच झुलला. यंदा कोरोनामुळे अनेक मुलींची लग्न मोजक्या उपस्थितीत; तसेच साधेपणामुळे झाले. या नवविवाहित मुलींचा यंदाचा नागपंचमीचा पहिला सण. त्यांना दिवसभर आठवणींच्या हिंदोळ्यावर माहेर खुणावत राहिले.

हेही वाचा : धामनाच्या सांडव्यावरून झुळझुळ पाणी 

दरम्यान, नागपंचमीच्या निमित्ताने गावातून निघणाऱ्या नागपाट्याही यावर्षी निघाल्या नाहीत. वारुळावरही फारशी गर्दी नव्हती. घरातच भिंतीवर नागोबाची चित्र काढून अनेकांनी पूजा केली. 

(संपादन : संजय कुलकर्णी)