राज्य सरकारच्या एक निर्णय, अन् विशेष रुग्णालयांची संख्या दुप्पट

मुंबई : कोरोनाचा प्रादुर्भाव रोखण्यासाठी आरोग्य विभागाने राज्यातील 30 शासकीय रुग्णालये कोरोना उपचारासाठी विशेष रुग्णालये म्हणून घोषित केली आहेत. त्यानंतर आता आरोग्य विभागाकडून नव्याने आठ रुग्णालये; तर वैद्यकीय शिक्षण विभागाकडून 17 रुग्णालये अधिसूचित करण्यात आली आहेत. त्यामुळे अतिरिक्त 4355 खाटांची उपलब्धता झाली आहे. पूर्वी घोषित केलेल्या 30 रुग्णालयांतील 2305 खाटा आणि आताच्या 4355 खाटा अशा राज्यात एकूण 6660 खाटा कोरोनाबाधितांच्या उपचारासाठी उपलब्ध आहेत, अशी माहिती आरोग्यमंत्री राजेश टोपे यांनी आज दिली. 

ही बातमी वाचली का? मातांनो, आता बाळाची काळजी घ्या 

दोन्ही विभागांनी काढलेल्या अधिसूचनांमुळे या रुग्णालयांना संशयित आणि कोरोना निदान झालेल्या रुग्णांना केंद्र आणि राज्य सरकारने वेळोवेळी दिलेल्या मार्गदर्शक सूचनांनुसार उपचार करणे बंधनकारक असणार आहे. राज्य सरकारमार्फत कोरोना उपचारासाठी विशेष रुग्णालये घोषित करण्यात आली असून, त्यासाठी आरोग्य आणि वैद्यकीय शिक्षण विभागाच्या संचालकांनी अधिसूचना काढली आहे, असेही आरोग्यमंत्र्यांनी या वेळी सांगितले. 

ही बातमी वाचली का? लॉकडाऊनच्या काळात मंत्रालयात जाणे झालंय सोपं! 

सरकारच्या अधिसूचनेनुसार विभागाच्या अखत्यारीतील 30 रुग्णालये विशेष उपचारासाठी घोषित केली होती. त्यानंतर पुन्हा 6 एप्रिल रोजी ठाणे जिल्हा रुग्णालय, उल्हासनगर रुग्णालय क्रमांक 5, पालघर ग्रामीण रुग्णालय, नंदुरबार, जालना, बीड आणि नांदेड जिल्हा रुग्णालय आणि मूर्तिजापूर उपजिल्हा रुग्णालय अधिसूचित झाल्याने त्यामधील एकूण 630 खाटांची उपलब्धता झाली आहे; तर वैद्यकीय शिक्षण विभागाच्या पुणे, बारामती, सोलापूर, कोल्हापूर, नागपूर, यवतमाळ, अकोला, गोंदिया, चंद्रपूर, धुळे, लातूर, नांदेड, मिरज, औरंगाबाद, जळगाव आणि अंबाजोगाई येथील वैद्यकीय महाविद्यालयातील रुग्णालये अधिसूचित केली आहेत. त्यामुळे एकूण 3725 खाटा कोरोनाबाधितांसाठी उपलब्ध झाल्या आहेत.