नेरळ : कर्जत तालुक्याला बसत असलेला कोरोनाचा विळखा आणखी घट्ट होत आहे. तालुक्यातील कोरोना पॉझिटिव्ह रुग्णांची संख्या शंभरच्या पुढे गेली आहे. यासाठी किरवली ग्रामपंचायतमधील बोरवाडीमध्ये झालेले उत्तरकार्य महाग पडले आहे. आत्तापर्यंत उत्तरकार्यात सहभागी झालेले 16 जण कोरोना बाधित झाले आहेत. त्यांचा अहवाल शनिवारी (ता.27) प्राप्त झाला असून एकाच दिवशी तब्बल 22 नवीन रुग्ण आढळून आले आहेत. 

ही बातमी वाचली का? येमेन, सौदी युद्धातील सैनिक मुंबईत येऊन घायाळ; दोघांना पुण्यातून अटक

कालपर्यंत कर्जत तालुक्यातील 91 रुग्ण पॉझिटिव्ह होते. किरवली ग्रामपंचायतमधील बोरवाडी गावात एका नामवंत व्यक्तीचे निधन झाले होते. त्या व्यक्तीचे दशक्रिया विधी तसेच उत्तरकार्य 18 जून रोजी आयोजित करण्यात आले होते. त्या दोन्ही कार्यात मोठ्या प्रमाणात लोक जमले होते. 

ही बातमी वाचली का? उल्हासनगरच्या सर्वात 'तरूण' आयुक्तांची कोव्हिडवर मात करण्यासाठी खास 'रणनिती'

मात्र त्या व्यक्तीच्या कुटुंबातील एक 61 वर्षीय महिला पाॅझिटिव्ह आले. त्यामुळे दशक्रियेला उपस्थित असलेल्या 45 जणांची तपासणी करण्यात आली. यातील तब्बल 15 जण पॉझिटिव्ह आले आहेत. त्यात बोरवाडी, कर्जत- भिसेगाव, दहिवली पाटील आळी तसेच डिकसळ, वंजारवाडी आणि चोरावळे येथील नागरिकांचा समावेश आहे. त्यामुळे तालुक्यातील एकूण कोरोना पॉझिटिव्ह रुग्णांची संख्या 113 वर जाऊन पोहचली आहे.