Pandhrinath Phadke : पंढरीनाथ फडके यांची अखेर तुरुंगातून सुटका, अंदाधुंद गोळीबार प्रकरणी ८ महिने भोगला कारावास

डोंबिवली : अंबरनाथ एमआयडीसी परिसरात बैलगाडा शर्यतीवरून वाद झाला होता. या वादातून पंढरीनाथ फडके यांनी राहुल पाटील आणि त्यांच्या समर्थकांवर अंदाधुंद गोळीबार केल्याप्रकरणी कारागृहात असलेले महाराष्ट्र राज्य बैलगाडा संघटनेचे अध्यक्ष पंढरीनाथ फडके यांची अखेर कारागृहातून सुटका करण्यात आली आहे.

मोक्का कायद्यांतर्गत अटक झाल्यानंतर गेले आठ महिने फडके हे ठाणे मध्यवर्ती कारागृहात न्यायालयीन कोठडीत होते. मुंबई उच्च न्यायालयानं फडके यांची जामिनावर सुटका केली आहे. जामिनासाठी फडके यांच्याकडून 50 हजारांची हमी घेण्यात आली असून याचं उल्लंघन झाल्यास जामीन रद्द करण्याचा इशारा न्यायालयानं दिला आहे.

पनवेल येथील पंढरीनाथ फडके आणि कल्याणचे राहुल पाटील यांच्यात बैलगाडा शर्यतीवरून वाद झाले होते. याच वादातून नोव्हेंबर 2022 मध्ये अंबरनाथ एमआयडीसी परिसरात फडके गटाने राहुल पाटील आणि त्यांच्या समर्थकांवर अंदाधुंद गोळीबार केला होता. याप्रकरणी फडके यांच्यासह एकूण 32 जणांवर मोक्का कायद्यांतर्गत गुन्हा दाखल होऊन त्यांना अटक झाली होती. याप्रकरणी 8 महिने ठाणे मध्यवर्ती कारागृहात राहिल्यानंतर अखेर फडके यांची मुंबई उच्च न्यायालयानं जामिनावर सुटका केली.

जामिनासाठी फडके यांच्याकडून 50 हजारांची हमी घेण्यात आली असून याचं उल्लंघन झाल्यास जामीन रद्द करण्याचा इशारा न्यायालयानं दिला आहे. तसंच पुढील 2 वर्ष दर महिन्याच्या पहिल्या सोमवारी फडके यांना अंबरनाथच्या शिवाजीनगर पोलीस ठाण्यात येऊन हजेरी लावावी लागणार आहे. दरम्यान, आता फडके बाहेर आल्यानंतर बैलगाडा शर्यतींना पुन्हा एकदा रंगत येणार असल्याची चर्चा बैलगाडा शर्यत प्रेमींमध्ये सुरू झाली आहे.