Mumbai : किलबिलाट अ‍ॅम्ब्युलन्स उपक्रम लवकरच राज्यभर सुरु होणार

मुंबई : गर्भवती माता आणि बालके यांच्यासाठी आल्हाददायक वातावरण असलेल्या किलबिलाट अ‍ॅम्ब्युलन्सचे आज येथे उद्घाटन करण्यात आले. लवकरच ही सेवा राज्यभर सुरु होईल, असेही सांगण्यात आले.

सह्याद्री अतिथीगृहावर झालेल्या या कार्यक्रमास महिला व बालविकास मंत्री मंगलप्रभात लोढा, आमदार प्रवीण दरेकर, मुंबई महापालिकेचे आयुक्त डॉ. इकबालसिंह चहल आदी मान्यवर उपस्थित होते. या ॲम्बुलन्सच्या माध्यमातून गर्भवती माता आणि बालकांना सुविधा मिळणार असून, ज्या बालकांना कोणी पालक नाही अशा बालकांचे पुनर्वसन करणे, त्यांना योग्य उपचार मिळवून देणे, ही सेवा प्राधान्याने दिली जाईल.

महिला व बालविकास विभाग, जिल्हा नियोजन विभाग आणि मुंबई महापालिका यांच्यातर्फे हा उपक्रम राबवला जात आहे. पंतप्रधान नरेंद्र मोदी गुजरातचे मुख्यमंत्री असताना गुजरातेत त्यांनी किलबिलाट अॅम्ब्युलन्स सेवा सुरू केली होती. त्याच धर्तीवर मुंबईत आणि महाराष्ट्र राज्यात ही सेवा सुरू करण्यात येत असून मुंबईत पाच अँब्यूलन्स येतील व नंतर या सेवेचा राज्यभर विस्तार होईल, असे लोढा यांनी सांगितले.