'संजय गांधी राष्ट्रीय उद्याना'त भरणार 'निसर्ग शाळा'

मुंबई : शाश्वत पर्यटन आणि निसर्ग संवर्धन यांबाबत जनजागृती घडवण्याच्या उद्देशाने 'संजय गांधी राष्ट्रीय उद्याना'ने 'निसर्ग शाळा उपक्रम' हाती हाती घेतला आहे. याअंतर्गत पर्यटकांना राष्ट्रीय उद्यानात भटकंती करण्यासोबतच निसर्ग माहिती अधिकाऱ्यांशी संवाद साधण्याची संधी मिळणार आहे.

'संजय गांधी राष्ट्रीय उद्याना'त विविध प्रकारची झाडे, प्राणी, पक्षी आणि कीटक आढळतात. ते पाहण्यासाठी मोठ्या संख्येने पर्यटक येथे येतात. यासाठी वर्षभर उद्यानातर्फे विविध सहलींचे आयोजन केले जाते. याचाच एक भाग म्हणून येत्या महाराष्ट्र दिनी निसर्ग शाळा उपक्रमाचे उद्घाटन केले जाणार आहे.

विविध आकर्षणांना भेट देत उद्यान पाहण्याची आणि सखोल माहिती जाणून घेण्याची सुवर्णसंधी यानिमित्ताने पर्यटकांना मिळणार आहे. दर शनिवारी आणि रविवारी या सहली आयोजित केल्या जातील. सकाळी ७ ते ९ या वेळेत 'शिलोंडा सहल' आयोजित केली जाईल. त्यानंतर ९.३० ते १०.३० या वेळेत 'निसर्ग माहिती केंद्र' येथे माहितीपट दाखवला जाईल व निसर्ग माहिती अधिकारी संवाद साधतील. त्यानंतर फुलपाखरू उद्यानात भ्रमंती केली जाईल.

उपक्रमात सहभागी होण्यासाठी प्रतिव्यक्ती ५०० रुपये शुल्क आहे. १२ वर्षांखालील मुलांसाठी २०० रुपये शुल्क आहे. ४ वर्षांखालील मुलांसाठी हा उपक्रम मोफत आहे. उपक्रमात सहभागी होण्यासाठी संपर्क - ८४५०९५८७४१.