नालासोपारा : भिंतीवरून वाद, भावाने केला बहिणीवर कोयत्याने हल्ला

नालासोपारा : संपत्तीच्या वादातून सख्ख्या भावाने मोठ्या बहिणीवर (sister murder) कोयत्याने प्राणघातक हल्ला केल्याची घटना विरारमध्ये (virar) घडली आहे. या हल्ल्यात बहीण गंभीर जखमी असून तिच्यावर संजीवनी रुग्णालयात उपचार सुरू आहेत. याप्रकरणी विरार पोलीस ठाण्यात आरोपी भावाविरोधात गुन्हा दाखल करून त्याला अटक करण्यात आली. (Nalasopara crime news)

विरार पश्‍चिमेकडील भाजीमार्केट गल्लीत स्मिता सुधीर शाह (वय ६५) आणि राजू पाटील (वय ५०) यांचे शेजारीशेजारी घर आहे. गेल्या काही दिवसांपासून या भावा-बहिणीमध्ये संपत्तीसह घराच्या भिंतीवरून वादविवाद चालू होता. गुरुवारी सकाळी पावणे नऊच्या सुमारास सामायिक भिंतीवरून पुन्हा वाद निर्माण झाला. या वादातून राजू याने बहीण स्मिता हिच्यावर कोयत्याने प्राणघातक हल्ला केला. या हल्ल्यात गंभीर जखमी झालेल्या स्मिता यांनी आरडाओरड केली.

या वेळी घरातील अन्य मंडळी आणि शेजाऱ्यांनी धाव घेत जखमी स्मिता यांची सुटका करत संजीवनी रुग्णालयात उपचारासाठी दाखल केले. सदर घटनेची माहिती मिळताच पोलिसांनी घटनास्थळी धाव घेत आरोपी भावाविरोधात गुन्हा दाखल करत अटक केली असल्याची माहिती विरार पोलिस ठाण्याचे वरिष्ठ पोलिस निरीक्षक सुरेश वराडे यांनी दिली.