वाशी : बांधकाम साहित्याच्या किमतीत भरमसाट वाढ; घरांच्या किमती वाढणार ? vashi news update | Sakal
sakal

बोलून बातमी शोधा

Home
वाशी : बांधकाम साहित्याच्या किमतीत भरमसाट वाढ; घरांच्या किमती वाढणार ?

वाशी : बांधकाम साहित्याच्या किमतीत भरमसाट वाढ; घरांच्या किमती वाढणार ?

वाशी : गेल्या दोन महिन्यांमध्ये बांधकाम साहित्याच्या किमतीत (construction materials) भरमसाट वाढ झाल्यामुळे कन्स्ट्रक्शन कॉस्टमध्ये (cost increases) प्रतिचौरस फुटामागे अडीचशे ते तीनशे रुपयांनी वाढ झाली आहे. परिणामी, घरांच्या किमतीही वाढणार (House price may increase) असून सामान्यांना घर घेणे अवघड होणार आहे. दोन वर्षांपासून बांधकाम साहित्याच्या किमती सातत्याने वाढतच आहेत. स्टील, सिमेंट, विटा, रेती, खडी या सर्व साहित्याच्या किमतीत २० ते २५ टक्क्यांची वाढ झाली आहे. दोन महिन्यांपूर्वी २८० रुपयांना असणारी सिमेंटची (cement) गोणी आता ३५० रुपयांवर गेली आहे. सिमेंट कंपन्या एकी करून ठरवून किमती वाढवत असल्याचे बांधकाम व्यावसायिकांचे मत आहे.
स्टीलचे दरही सातत्याने चढेच आहेत.

हेही वाचा: रायगड : २३५ ग्रामपंचायतींची प्रभाग सीमा निश्चिती अंतिम टप्प्यात

दोन वर्षांपूर्वी ४० रुपये किलोप्रमाणे असलेले स्टील दिवाळीदरम्यान ६० रुपयांवर होते. आता ते ६८ रुपयांवर पोचले आहे. वाळू, रेतीसह सर्व प्रकारच्या गौण खनिजांवरील रॉयल्टी वर्षभरापूर्वी दुप्पट करण्यात आल्यानंतर त्याच्या किमतीतही भरमसाट वाढ झाली आहे. आधी सहा हजार रुपये प्रतिब्रासप्रमाणे मिळणारी वाळू आता ७,००० ते ७,५०० रुपयांवर पोचली आहे. त्यातच रेती उपाशावर बंदी असल्यामुळे वाळूचा तुटवडा जाणवत असतो. बांधकाम साहित्याचे दर सातत्याने चढेच असल्यामुळे त्याचा परिणाम घरांच्या किमती २० ते २५ टक्क्यांनी घरे वाढण्याची शक्यता आहे.

टाइल्स, मार्बलही महागले

घरासाठी टाइल्स, दारे-खिडक्‍यांच्या चौकटींसाठी मार्बल, कडप्प्यांची आवश्यकता भासते. या दोन्हींच्या किमतीतही मोठी वाढ झाल्याचे तुर्भे येथील येथील मार्बल व्यावसायिकांनी सांगितले. दोन बाय दोन चौरस फूट आकाराच्या टाइल्सचा बॉक्स आधी चारशे रुपये होता, तो आता ४८० रुपयांवर गेला आहे. एक बाय दीड चौरस फूट टाइल्सचा बॉक्सही १९० रुपयांवरून २३० रुपयांवर पोहचला आहे. कडप्पा आधी ३६ रुपये चौरस फूट होता, तो आता ४५ रुपयांवर गेला आहे. ग्रेनाइटच्या दरांत सध्या फारशी वाढ झालेली नसल्याचे त्यांनी सांगितले.

हेही वाचा: ठाणे : निवडणुकीपूर्वी भाजपाला खिंडार, दिव्यातील पदाधिकारी शिवसेनेत

पेट्रोल-डिझेलच्या भाववाढीमुळे वाहतूक खर्च वाढला आहे. परिणामी बांधकाम साहित्य महागले आहे. ग्राहकांकडून मागणी चांगली आहे. मात्र, काही साहित्य उपलब्ध होत नाही.
- राकेश म्हात्रे, विक्रेता, बांधकाम साहित्य

बांधकाम साहित्य सातत्याने महाग होत आहे. त्यामुळे बांधकाम खर्चात मोठी वाढ होत असून, अंतिमतः ग्राहकांवरच हा बोजा पडणार आहे. घरांच्या किमतीत २० टक्क्यांपर्यंत वाढ होऊ शकते.
- विजय मिश्रा, बांधकाम व्यावसायिक

साहित्य - आधीचे दर- सध्याचे दर

सिमेंट (प्रतिबॅग) - २८० - ३५०
वाळू (प्रतिब्रास) - ६००० - ७५००
वॉश सँड (प्रतिब्रास) - ३८०० -४८००
खडी (प्रतिब्रास) - २३०० -२८००
विटा सहा इंच (प्रतिहजार) - १०,०००- १४०००
विटा चार इंच (प्रतिहजार) - ६५०० -८०००
ब्लॉक (प्रति घनमीटर) - २८००-३३००
खडी (प्रतिब्रास) - २३००-२८००
कच पावडर (प्रतिब्रास) - २३०० - २८००

Web Title: Todays Latest Marathi News

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :cement plantVashi
go to top