इचलकरंजी (कोल्हापूर) : क्वारंटाईल असलेल्या शहरातील एका गर्भवती महिलेवर उपचारासाठी फरफट झाली. अनेक वैद्यकीय व्यावसायिक कोरोनाच्या साथीत हात झटकत असल्याची थेट तक्रार पालक मंत्र्यांपासून मंत्रालयातील सचिव पातळीपर्यंत पोहचली आणि त्यानंतर तातडीने सायंकाळी आयजीएम रूग्णालयात बैठक घेण्यात आली. अखेर उपचारासाठी क्रमानुसार सहकार्य करण्याचे आश्‍वासन डॉक्टरांनी दिले. याबाबत प्रांत कार्यालयात नियोजीत आराखड्यासाठी बैठक होणार आहे.
शहरात कोरोनाचा एकही रूग्ण नसला तरी अत्यावश्यक सर्व दक्षता घेण्यात येत आहेत. शासनाचे आयजीएम सामान्य रूग्णालय कोरोनासाठी राखीव ठेवण्यात आल्याने त्या ठिकाणी येणार्‍या रूग्णांच्यावर अन्य खासगी रूग्णालयात उपचार करण्याचे ठरले आहे. एका होमक्वारंटाईन गर्भवती महिलेला काल वेदना सुरू झाल्या. यावेळी दोन्ही खासगी रूग्णालयाने उपचार करण्यास नकार दिला. आयजीएम रूग्णालयातही या ठिकाणी अन्य उपचार होत नसल्याचे सांगण्यात आले. त्यामुळे या महिलेला अन्यत्र उपचारासाठी जाण्याची वेळ आली.
गर्भवती महिलेला करावी लागली फरपट
शहरात गर्भवती महिलांच्या शस्त्रक्रियासह अन्य शस्त्रक्रियेसाठी डॉक्टर टाळाटाळ करत असल्याची तक्रार अनेकांनी केली. याबाबत येथील प्रशासकीय पातळीवर फारशा हालचाली होत नसल्याने याबाबत थेट मंत्रालयात तक्रार झाली. मंत्रालयातील याबाबतचा जाब येथील अधिकार्‍यांना विचारण्यात आला. त्याचबरोबर लोकप्रतिनिधींनाही याबाबत आपण तातडीने लक्ष घालण्याचे निर्देश देण्यात आले.या पार्श्‍वभूमीवर सायंकाळी आयजीएम रूग्णालयात बैठक झाली.
डॉक्टरांची ही भूमिका योग्य नाही
या बैठकीस आमदार प्रकाश आवाडे, नगराध्यक्षा सौ. अलका स्वामी, मुख्याधिकारी दिपक पाटील, आरोग्य अधिकारी डॉ. सुनिलदत्त संगेवार, आयजीएमचे प्रमुख आर. आर. शेटे, जिल्हा परिषद सदस्य राहुल आवाडे, नगरसेवक सुनिल पाटील, येथील वैद्यकीय संघटनेचे प्रतिनिधी उपस्थित होते. यावेळी आमदार श्री. आवाडे यांनी शहरातील डॉक्टरांच्याकडून सहकार्य मिळत नसल्याबद्दल नाराजी व्यक्त करून अशा आणीबाणीच्या स्थितीत डॉक्टरांची ही भूमिका योग्य नसल्याचे खडसावले. यावेळी लोकप्रतिनिधी व अधिकार्‍यांनीही शहरातील रूग्णांची हेळसांड होत असेल तर योग्य त्या कार्यवाहीचा इशाराही दिला. अखेर क्रमानुसार वैद्यकीय उपचार कोठे कोठे होतील याचा आराखडा देण्याचे आश्‍वासन शहरातील डॉक्टरांनी दिले. त्यानंतर ही बैठक संपली.
हेही वाचा-म्हणून साखरतर, राजिवडा बंदर मासेमारीसाठी बंदच...
सामाजिक भान कुठे गेले ?
तब्बल 3 लाख लोकसंख्या असलेल्या या शहरात केवळ येथीलच नव्हे तर हातकणंगले शिरोळ तालुक्याबरोबर सीमा भागातील कर्नाटकातील रूग्णही उपचारासाठी येतात. सध्या देशावरील या संकटाच्या प्रसंगी सर्व ठिकाणी वैद्यकीय व्यावसायिक पुढे आले आहेत. मात्र इचलकरंजीतीलच डॉक्टरांची समर्पण वृत्ती कुठे गेली आहे असा खडा सवाल आजच्या बैठकीत करण्यात आला. जर उपचार करणार नसालच तर पुढे काय करायचे ते आम्ही दाखवून देऊ असा दमही आजच्या बैठकीत देण्यात आला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.