अभिनेते महेश कोठारे यांना  कलायात्री पुरस्कार जाहीर 

कोल्हापूर :  नटश्रेष्ठ जयशंकर दानवे यांच्या स्मृतिप्रीत्यर्थ देण्यात येणारा कलायात्री पुरस्कार यंदा अभिनेते दिग्दर्शक महेश कोठारे यांना जाहीर झाला आहे. येथील शाहू स्मारक भवनात 1 मार्चला सायंकाळी 5 वाजता पुरस्काराचे वितरण होणार आहे. 
रुपेरी पडद्यावर बुलंद अभिनयाचा ठसा उमटवणारे नटश्रेष्ठ जयशंकर दानवे यांच्या 11 व्या जयंती दिनानिमित्ताने पुरस्कार वितरण होत आहे. दानवे यांच्या कन्या जयश्री दानवे, त्यांचे बंधू राजवर्धन दानवे परिवारातर्फे गेली 35 वर्षे सांस्कृतिक उपक्रम राबवले जातात. त्याचाच भाग म्हणून नाटक, चित्रपट, मालिकांत अभिनयाचा ठसा उमठविणाऱ्या कलावंतांना कलायात्री पुरस्कार देण्यात येतो.

हेही वाचा- इचलकरंजीत राडा ; मनसेच्या कार्यकर्त्यांनी महावितरणचे कार्यालय फोडले

दिलीप प्रभावळकर, डॉ. मोहन आगाशे, सदाशिव अमरापूरकर, अरुण नलवडे, सुबोध भावे, डॉ. गिरीश ओक, अविनाश नारकर आदींना या पुरस्काराने सन्मानित केले आहे. कोठारे यांचे चित्रपट, मालिका, नाट्य या क्षेत्रातील दीर्घकाळाचे योगदान विचारांत घेऊन त्यांना हा पुरस्कार देण्यात येणार आहे. पुरस्कार वितरणानंतर श्री. कोठारे यांची प्रा. डॉ. सुजय पाटील मुलाखत घेणार आहेत. ही माहिती श्री. दानवे परिवार, सुधीर पेटकर यांनी दिली आहे. 

हेही वाचा- श्वेता आणि बाळाच्या मृत्यूने नातेवाईकांसह ग्रामस्थांचा आक्रोश;  न्यायासाठी गाव गोळा

संपादन - अर्चना बनगे