सावधान : ‘केक गॅलरी’ व्हॉटस ॲप ग्रुपवर कोरोनाबाबत खोटी माहिती : पाच जणांवर गुन्हा....

कोल्हापूर : कोरोनाबाबत अफवा पसरविणाऱ्या पाच जणांवर आज गुन्हा दाखल झाला. ‘हातकणंगले तालुक्‍यात कोरोनाचे २७  संशयित’ अशी खोटी माहिती ‘केक गॅलरी’ या व्हॉटस ॲप ग्रुपवर पसरविण्यात आली होती. याप्रकरणी अश्‍विन ओसवाल याच्यावर शाहूपुरी पोलिस ठाण्यात सायबर आणि राष्ट्रीय आपत्ती व्यवस्थापन कायद्यान्वये गुन्हा दाखल केल्याची माहिती शाहूपुरी पोलिसांनी दिली.

 अन्य दहा व्हॉटस्‌ ॲप ग्रुपवर सायबर पोलिसांची करडी नजर आहे. सोशल मीडियावरून अफवा पसरविल्याच्या कारणास्तव शाहूपुरी  पोलिस ठाण्यात तर काल इचलकरंजीतील शिवाजीनगर पोलिस ठाण्यात गुन्हे दाखल झाले आहेत. 

हेही वाचा- राजकीय घडामोडीना कोरोनाचा व्हायरस

अफवा पसरविणाऱ्या  पाच जणांवर गुन्हा
दरम्यान, कोरोनाबाबत व्हॉटस्‌ ॲप आणि सोशल मीडियावरून अफवा पसरविणाऱ्यांवर गुन्हे दाखल करण्याचे आदेश पोलिस अधीक्षक डॉ. अभिनव देशमुख यांनी दिले आहेत. सायबर पोलिस ठाण्याच्या माध्यमातून दहा व्हॉटस्‌ ॲप ग्रुप व अन्य काही संशयितांच्या सोशल मीडियावरही पोलिसांनी लक्ष्य केंद्रीत केले आहे. कोरोनाबाबत कोणतीही अनधिकृत माहिती किंवा अफवा पसरविणाऱ्या व्यक्‍ती, संस्था, संघटना यांच्यावर थेट कारवाई करण्यात येणार आहे. सोशल मीडियाच्या माधम्यातून अशा अफवा पसरविल्या जात असल्याचे सायबर पोलिसांच्या निदर्शनास आले आहे. त्यामुळे सोशल मिडीयावर अफवा पसरविणाऱ्यांवर तत्काळ गुन्हे दाखल करण्याचे आदेश अधीक्षक डॉ. अभिनव देशमुख यांनीही दिले आहेत. त्यानुसार गुन्हे दाखल होत आहेत.

 हेही वाचा- तीन दिवसात 800 फेऱ्या रद्द

इचलकरंजीत  चौघांवर कारवाई
इचलकरंजी : कोरोना रुग्ण आढळल्याच्या अफवा समाज माध्यमातून व्हायरल करणाऱ्या चौघांवर शिवाजीनगर पोलिसांत गुन्हा नोंद झाला आहे. मयुरेश बाळकृष्ण पानारी (वय २९, रा. आझाद चित्रमंदिरजवळ), अभिनंदन अरुण कुडाळकर (३०, रा.घोडगे गल्ली), निलेश भिमराव परदेशी (४२), निखील भाऊसाहेब बंडकाळ (२१, दोघेही राहणार शहापूर) अशी त्यांची नावे आहेत. त्यांचे मोबाईल जप्त करण्यात आले असून त्यांना पोलिसांनी कारवाईच्या नोटीसा दिल्या आहेत. या प्रकणातील मुख्य संशयितांचा शोध सुरु असल्याचे पोलीस निरिक्षक ईश्‍वर ओमासे यांनी सांगितले.