सावधान : मोबाईलवर तुम्हाला असा मेसेज येतो का ?  

कोल्हापूर : त्यांच्या मोबाईलवर एक मेसेज आला . त्या मोबाईल  क्रमांकावर त्यांनी संपर्क साधला. तो एका महिलेचा होता.  तिने चर्चा केली आणि  वरिष्ठ अधिकारीशी बोला असे सांगून बॅंकेच्या खात्यावर पैसे भरण्यास सांगितले. त्यांने ही भरले. अन् इथेच तो चांगला फसला. असे एक ना अनेक प्रकार आपण रोज ऐकतो, वाचत असतो तरीही त्याचे बळी ठरतो . ही हकीकत आहे एका एमबीबीएस’ पदवी मिळवू  पाहणाऱ्या युवकाची.

अन् इथेच तो फसला
 वसंत शेटे हे करवीर तालुक्‍यात राहतात. त्यांच्या मोबाईलवर २९ नोव्हेंबर २००० मध्ये एक संदेश आला. यात ‘एमबीबीएस’ पदवीसाठी ३० लाख रुपयांत प्रवेश मिळून देतो असा मजकूर होता. त्यात नमूद केलेल्या मोबाईल क्रमांकावर त्यांनी संपर्क साधला. तो मोबाईल क्रमांक संशयित ‘सोहाना’ नावाच्या महिलेचा होता. तिने प्रवेशाबाबत चर्चा केली. तिने वरिष्ठ अधिकारी म्हणून संशयित बिनयकुमार प्रधान याचा मोबाईल क्रमांक दिला.

हेही वाचा- शिक्षक व विद्यार्थ्यांची धांदल उडणार:   दहा महिन्यांचा अभ्यासक्रम तीन महिन्यांत पूर्ण करण्याचे आव्हान

शेटे यांनी त्याच्याशीही मोबाईलवर चर्चा केली. त्याने नगर, नाशिक या ठिकाणी १२ लाख रुपयांत प्रवेश मिळवून देतो असे सांगून बॅंकेच्या खात्यावर एक लाख रुपये भरण्यास सांगितले. त्यानुसार शेटे यांनी त्याच्या खात्यावर एक लाख रुपये भरले; मात्र त्यानंतर संशयित बिनयकुमार हा अधिक रकमेची मागणी करू लागला. 

याबाबत पोलिसांनी दिलेली माहिती अशी की,

‘एमबीबीएस’ पदवीसाठी प्रवेश मिळवून देतो, असे आमिष दाखवून ओडिशातील दोघा भामट्यांनी लाखाचा गंडा घातला. याप्रकरणी करवीर पोलिस ठाण्यात गुन्हा नोंद झाला. सोहाना मॅडम, बिनयकुमार प्रधान (दोघे रा. माचुर्ली, सलेपूर कटक, ओडिशा) अशी संशयितांची नावे आहेत. दोघा संशयितांनी एक लाखाची फसवणूक केल्याची फिर्याद शेटे यांनी दिली. दोघा संशयितांच्या प्राप्त झालेल्या मोबाईल क्रमांकाद्वारे पोलिसांनी पुढील तपास सुरू केला आहे.

संपादन- अर्चना बनगे