कुटुंबीयांसह गेले रुग्णालयात तोपर्यत चोरट्यांनी मारला डल्ला...

कोडोली (कोल्हापूर) : जाखले(ता. पन्हाळा) येथे चोरट्याने बंद बंगल्याचे कुलूप तोडून १७ तोळे सोन्याचे दागिने,  ३४ हजारांच्या रोकडसह पावणेचार लाखांची चोरी करून पळ काढला. यामुळे परिसरात खळबळ उडाली आहे. रविवारी पहाटे चोरी झाल्याची नोंद कोडोली पोलिसांत झाली आहे. खुदबुद्दीन रमजान शिकलगार यांनी याबाबतची फिर्याद दिली आहे. अज्ञात चोरट्याविरोधात कोडोली पोलिसांत गुन्हा नोंद झाला आहे.

हेही वाचा- सहलही चुकली; पैसेही मिळेनात ; विद्यार्थ्यांनी जायचे कोठे?

याबाबत घटनास्थळ आणि पोलिसांकडून मिळालेली माहिती अशी,

शिकलगार हे शनिवारी रात्री सून अलिया हिच्या पोटात दुखू लागल्याने तिला रुग्णालयात दाखल करण्यासाठी कुटुंबीयांसह गेले होते. याचा फायदा चोरट्याने घेतला आणि काही वेळातच शिकलगार यांच्या बंगल्याचे कुलूप तोडून बेडरूममधील कपाट फोडून सुमारे १७ तोळे सोन्याचे दागिने चोरले. यामध्ये दोन मंगळसूत्रे, दोन नेकलेस, दोन चेन, पाच अंगठ्यांसह रोख ३४ हजार असा ३ लाख ७४ हजारांचा ऐवज चोरीला गेला आहे.

हेही वाचा- पक्षातूनच फितुरी; राजहंसगड फलकावरुन राजकारण; मराठी भाषिकांतून संताप

 चोरट्याविरोधात कोडोली पोलिसांत गुन्हा नोंद ...
जाखलेच्या पोलिसपाटील उजाला अजित पाटील यांनी कोडोली पोलिसांना घटनेची माहिती दिली. त्यानंतर तत्काळ सहायक पोलिस निरीक्षक सूरज बनसोडे, फौजदार नरेंद्र पाटील, हवालदार संभाजी पाटील, विनायक पाटील, विजय सोनुले यांसह अन्य कर्मचाऱ्यांनी तपासाला सुरवात केली. कोल्हापूर मुख्यालयातून तातडीने श्‍वान पथक मागवले; मात्र श्‍वान घराजवळील ओढ्यापर्यंतच घुटमळले. यानंतर कपाटावर व साहित्यावर चोरट्याचे ठसेही  घेतले आहेत. अंगुली मुद्राचे सहायक पोलिस निरीक्षक पुणेकर, फौजदार लंडगे यांनी श्‍वान पथकासह तपास सुरू केला आहे.