Aamir Khan in Sangli : 'तिळगंगा'बाबत अभिनेता आमिर खाननं घेतला महत्वाचा निर्णय; लवकरच देणार करमाळेला भेट

शिराळा : तिळगंगा नदी (Tilganga River) पुनरुज्जीवन संदर्भात करमाळे (ता. शिराळा) येथील सरपंच व ग्रामस्थांनी मुंबई येथे अभिनेते अमीर खान (Aamir Khan) यांची भेट घेतली. खान यांनी करमाळेला लवकरच भेट देण्याचे आश्वासन दिल्याची माहिती सरपंच सचिन पाटील यांनी दिली.

पाटील म्हणाले,‘‘तिळगंगा नदी पुनरुज्जीवन कामात ग्रामप्रकाश संस्थेला (Gram Prakash Sanstha) अमीर खान मदत करणार आहे. आता कामाला गती येणार आहे. लवकरच स्वतः आमिर खान तिळगंगा नदीच्या खोऱ्याची पाहणी करण्यास गावाला भेट देणार आहेत. सत्यजित भटकळ व अमीर खान यांची कन्या व अगत्सु फाउंडेशनच्या अहिरा खान यांच्यासोबत बैठक झाली.

अमीर खान व ग्रामप्रकाश संस्था मिळून सोबत काम करतील, असे सांगितले. प्रदीप गारोळे (संचालक, पाणलोट विकास व व्यवस्थापन केंद्र, यशदा, पुणे) यांची ग्रामधन (ग्रामकोष) संकल्पना असून ग्रामप्रकाश संस्थेचे सचिव प्रकाश पाटील यांनी विस्तृत माहिती दिली. करमाळेने ग्रामधन संकल्पनेचा महाराष्ट्रातील पहिला ग्रामसभा ठराव केला आहे.

दरम्यान, महाराष्ट्र जलसंपत्ती नियमन प्राधिकरणाच्या सहसंचालक प्रियांका सकटे यांचीही भेट घेण्यात आली. त्यांनी वाकुर्डे उपसा सिंचन योजनेच्या पाण्यापासून वंचित करमाळेसह इतर गावांच्या सद्यस्थितीची संबंधित विभागातील अधिकाऱ्यांकडून माहिती घेतली. आराखडा करण्याच्या सूचना दिल्या. करमाळे हे महावितरणच्या भगीरथ योजनेपासून वंचित असल्यामुळे मुंबई येथे महावितरण व्यवस्थापक अशोक साळुंखे यांची भेट घेतली.

त्यांनी संबंधित विभागांना सूचना करून प्रथम प्राधान्याने प्रश्न सोडविण्यात येईल, असे सांगितले. भारती विद्यापीठ (पुणे) चे प्रकाश संदे, जल व्यवस्थापक तीळगंगा नदी व जलनायक (यशदा, पुणे) चे प्रकाश पाटील, ग्रामसेवक राजेश सूर्यवंशी, विशाल पवार, राकेश माने उपस्थित होते.