Chandoli Dam : चांदोली धरण क्षेत्रात ढगफुटीसदृश पाऊस; वारणा नदीचे पाणी पात्राबाहेर, विक्रमी 9500 क्युसेकने विसर्ग

सांगली : चांदोली धरण (Chandoli Dam) पाणलोट क्षेत्रात रविवारी (ता. १) दुपारी झालेल्या ढगफुटीसदृश पावसामुळे वारणा धरण (Warna Dam) शंभर टक्के भरले. त्यानंतर विक्रमी ९५०० क्युसेकने पाण्याचा विसर्ग सुरू करण्यात आला. एवढ्या मोठ्या प्रमाणात नदीत अचानक पाणी आल्याने ‘वारणा’ अनेक ठिकाणी पात्राबाहेर पडली.

दुपारी कृष्णा-वारणा संगमावर ती दुथडी भरून वाहत होती. परतीचा पाऊस सुरू झाला आहे. काल जिल्हाभर दमदार पाऊस झाला. चांदोली धरण क्षेत्रात अत्यंत जोराचा पाऊस झाला. आठ-दहा गावांत व जंगल परिसरात ढगफुटीसारखा पाऊस कोसळला. ओढे-नाले भरून वाहू लागले. पाणी वारणा नदीत वेगाने मिसळले.

पावसानंतर धरण झपाट्याने भरले आणि त्यामुळे सायंकाळी ६४०० क्युसेक, तर रात्री उशिरा ९५०० क्युसेकने पाण्याचा विसर्ग सुरू करावा लागला. इतिहासातील हा सर्वांत मोठा विसर्ग ठरला. साहजिकच, त्यामुळे वारणा नदी भरून वाहू लागली. ती आज सकाळी दुथडी भरून वाहत होती.

काही ठिकाणी पाणी पात्राबाहेर पडले. अचानक पाणी आल्याने शेतकऱ्यांचीही तारांबळ उडाली. दरम्यान, कालच्या जोरदार पावसानंतर आज जिल्ह्यात सगळीकडेच उघडीप दिली. त्यामुळे छाटणी केलेल्या द्राक्ष बागायतदारांनी निःश्‍वास सोडला. पावसाने तळ ठोकला असता तर बागायतदारांची पंचाईत झाली असती.