सावधान ! स्वस्तातली मोटारसायकल घेताय

कोल्हापूर : शेताच्या कामासाठी वापरण्यासाठी किंमती मोटारसायकल पाच दहा हजाराला घ्या, निम्मे पैसे आता द्या, बाकीची कागदपत्रे पूर्ण झाल्यावर द्या... असे अामिष दाखवून चोरीच्या मोटारसायकल विकण्याचा फंडा चोरटे वापरू लागलेत. ग्रामीण भागातील अशिक्षितांना टार्गेट केले जात आहे. प्रबोधनासह संशयितांच्या माहितीसाठी पोलिसपाटलांची मदत घेण्यास पोलिस दलाने सुरवात केली आहे. 

शहरातील गजबजलेला भाग असो अगर निर्जन, बस स्थानक असो वा रेल्वे स्थानक येथे लावलेल्या मोटारसायकल सुरक्षित राहतील, याचा आता नियम राहिलेला नाही. दिवसा असो वा रात्री जिल्ह्यातील प्रत्येक पोलिस ठाण्यात किमान एक तरी मोटारसायकल चोरीला गेल्याची नोंद होत असते. मोटारसायकल चोरट्यांनी दोन चार वर्षात अक्षरशः धुमाकूळ घातला आहे. मोटारसायकल चोरीला जाण्याचे प्रमाण वाढले असले तरी त्या तुलनेत गुन्ह्याचा शोध लागत नसल्याचे चित्र आहे. शहरात सीसी टीव्हीचे जाळे असूनही मोटारसायकल चोरटे हे मोकाट राहण्याचे प्रमाण वाढले आहे.

हेही वाचा - कोल्हापूर झेडपीतील कॉग्रेसच्या यशाचे हे आहे सुत्र..
 
ग्रामीण भागातच विक्रीचे प्रमाण अधिक

चोरीच्या मोटारसायकल दुर्गम ग्रामीण भागातील शेताच्या बांधावरच राहिल्या तर त्या सापडणे अवघड असते. कारण या मोटारसायकल कधी शहरात येत नाहीत ना कधी सीसी टीव्हीच्या अगर पोलिसांच्या नजरेत येत नाहीत. यापूर्वी तपासात हाती लागलेल्या १०३ संशयित चोरट्यांच्या चौकशीत चोरीच्या मोटारसायकल त्यानी ग्रामीण भागातच विक्रीचे प्रमाण अधिक असल्याचे पुढे आले आहे. हात धागा पकडून पोलिस मोटारसायकल चोरट्यांच्या शोधासाठी आक्रमक झाले आहेत. 

हेही वाचा - लय भारी ! कोल्हापूरच्या उर्मीचा सिंगापूरमध्ये ठसा...!? 

 मोटारसायकल खरेदी करतानाची खबरदारी

गावात कोणी जुनी मोटारसायकल स्वतः खरेदी केली अगर करण्याचा प्रयत्न करत आहे का?, त्याची कागदपत्रे पूर्ण आहेत का? वाहन विक्रीसाठी आलेला व्यक्ती कोण आहे? याबाबतची माहिती भागातील पोलिस पाटलांनी दक्ष राहून घ्यावी. याबाबत ग्रामस्थांचे प्रबोधन करावे आणि शंका वाटल्यास संबधित संशयिताची माहिती पोलिसांना द्यावी असे आवाहन पोलिसांनी पोलिस पाटील यांना केले आहे. त्यानुसार पोलिस ठाण्याना हद्दीतील गाव गावात पोलिस पाटलांच्या संपर्कात राहण्याचे आदेश देण्यात आले आहेत. 

हेही वाचा -अप्रतिम ! या आहेत फुलांच्या सजावटीतील मास्टर !? 

२०१९ अखेर जिल्ह्यातील चोरीचा तपशील
प्रकार    गुन्हे घडले    उघड       
मोटारसायकल    ४६८    १३०
दरोडा    २८    २८
जबरी चोरी    १४२    १०६
घरफोडी    ३५६    १३९
इतर चोरी    ४३५    १२७

पोलिसपाटलांची मदत गरजेची

चोरीच्या मोटारसायकलचे व्यवहार हे दुर्गम आणि ग्रामीण भागातच अधिक होत असतात. चोरट्यांच्या शोधासाठी पोलिसपाटलांना मदत करण्याचे आवाहन करण्यात आले आहे. 
- तानाजी सावंत (पोलिस निरीक्षक, स्थानिक गुन्हे अन्वेषण)