Kolhapur Rain Alert : भूस्खलनाची भीती पन्हाळ्यात काळीज चिरतेय...

देवाळे : पन्हाळा व परिसरात दमदार पाऊस सुरु आहे. याच पावसाने पन्हाळगड व मसाई पठार भोवतालच्या डोंगरउतारावरील भूस्खलन होणाऱ्या गाव, वाड्यावस्त्यांवर राहणाऱ्या लोकांच्या मात्र काळजाचा ठोका चुकत आहे.

२०१९ पासून सलग दोन वर्षे पन्हाळगडावर भूस्खलन होऊन रस्ता पूर्णपणे बंद झाला. याच डोंगरमालेशी संलग्न जोतिबा डोंगर, मसाई पठार म्हाळुंगे, वेखंडवाडी, बादेवाडी, बोंगेवाडी व मराठवाडी गावांचीही हीच स्थिती झाली.

पन्हाळ्याच्या पायथ्याशी असणाऱ्या नेबापूर, मंगळवारपेठ, आपटी, बुधवारपेठ, रविवारपेठ गावांना नेहमीच भूस्खलनाचा धोका आहे. पन्हाळा, मसाई पठार व सभोवताली प्रचंड प्रमाणात पडणारा पाऊस, बेसुमार वृक्षतोड तसेच जमिनीचे मोठ्या प्रमाणात होणाऱ्या सपाटीकरणामुळे पावसाच्या पाण्याच्या प्रवाहात अडथळे निर्माण झाले आहेत.

त्यामुळे या परिसरातील जमीन खचण्याचे प्रमाण वाढले आहे. सध्या या परिसरात मुसळधार पाऊस असून नुकत्याच झालेल्या रायगड जिल्ह्यातील भूस्खलन दुर्घटनेनंतर प्रशासन अलर्ट झाले आहे. तहसीलदार माधवी शिंदे - जाधव यांनी सतर्कतेच्या सूचना दिल्या आहेत.

प्रशासनाने पन्हाळा व मसाई पठार पायथ्याशी सतत खचणारी जमीन याबाबत भूवैज्ञानिकांमार्फत परिसराचे वस्तुनिष्ठ सर्व्हेक्षण करावे. त्याची कारणे शोधून कायमस्वरूपी उपाययोजना करावी.

- अनिल कंदूरकर, माजी सभापती पंचायत समिती, पन्हाळा