Praniti Shinde : देशात लोकांची हुकूमशाही, पंतप्रधानांची नाही; प्रणिती शिंदेंची PM मोदींवर जोरदार टीका

पंतप्रधान नरेंद्र मोदींवर (Narendra Modi) विरोधक सातत्यानं टीका करत आहेत. आता काँग्रेस (Congress) आमदार प्रणिती शिंदे (Praniti Shinde) यांनी देखील पंतप्रधानांवर निशाणा साधला आहे.

देशात लोकांची हुकूमशाही आहे म्हणजेच लोकशाही आहे. कोणत्या पंतप्रधानाची हुकूमशाही नाहीये, असं म्हणत आमदार प्रणिती शिंदेंनी पंतप्रधान मोदी यांना टोला लगावला.

सोलापुरात (Solapur) हाथ से हाथ जोडो (Hath Se Hath Jodo) अभियानादरम्यान शिंदेंनी सोलापूरकरांशी संवाद साधला. त्यावेळी त्यांनी मोदींनाही धारेवर धरलं. आमदार शिंदे म्हणाल्या, निवडणुका असू देत अथवा नसू देत काँग्रेस आणि मी सदैव तुमच्या सेवेत आहोत. कदाचित, निवडणुका दरम्यान आम्ही तुमच्याकडं येणार नाही. मात्र, अडीअडचणीत तुमच्या सुखा-दुख:त मी सदैव तुमच्यासाठी धावून येईन, असं त्यांनी स्पष्ट केलं.

शिंदे पुढं म्हणाल्या, आपलं नातं हे आमदार आणि मतदाराचा नसून आई आणि मुलीचं आहे. आम्ही जर नाही आलो तर कान धरून खाली बसवा तो तुमचा अधिकार आहे. डॉ. बाबासाहेब आंबेडकरांनी (Dr. Babasaheb Ambedkar) दिलेल्या लोकशाहीचा तुमचा अधिकार आहे. देशात लोकांची शाही लोकशाही म्हणजेच लोकांची हुकुमशाही आहे. कोणत्या पंतप्रधानाची हुकूमशाही नाही आहे. आम्ही तुमचे सेवक आहोत, मी आमदार असेल माझ्या घरी, तुमच्यापेक्षा आम्ही मोठे नाही आहोत, असंही शिंदेंनी नमूद केलं. यावेळी त्यांनी मोदींवर जोरदार प्रहार केला.