Irrfan Khan: "तुम्हाला वचन देतो बाबा..."; वडिलांसाठी बाबिल खानची भावनिक पोस्ट

Irrfan Khan: दिवंगत अभिनेता इरफान खाननं (Irrfan Khan) त्याच्या अभिनयानं बॉलिवूडमध्ये विशेष ओळख निर्माण केली. इरफाननं चार वर्षांपूर्वी जगाचा निरोप घेतला होता. उद्या (29 एप्रिल) त्याची डेथ अॅनिवर्सरी आहे. याआधी इरफानचा मुलगा बाबिलने (Babil Khan) सोशल मीडियावर एक भावनिक पोस्ट शेअर केली आहे. त्याच्या या पोस्टनं अनेकांचे लक्ष वेधले आहे.

बाबिलची पोस्ट

बाबिलनं इरफानचे काही फोटो सोशल मीडियावर शेअर करुन कॅप्शनमध्ये लिहिलं, "तुम्ही मला योद्धा व्हायला शिकवले, तसेच प्रेम आणि दयाळूपणा देखील त्यांनी मला शिकवला. तुम्ही मला आशा शिकवली आणि मला लोकांसाठी लढायला शिकवले. तुमचे चाहते हे तुमचे एक कुटुंब आहे आणि मी तुम्हाला वचन देतो बाबा, तुम्ही मला बोलावेपर्यंत मी आपल्या लोकांसाठी आणि आपल्या कुटुंबासाठी लढेन. मी हार मानणार नाही. माझे तुझ्यावर खूप प्रेम आहे."

काही दिवसांपूर्वी देखील बाबिलने इरफानबाबत एक पोस्ट शेअर केली होती. यात त्यानं लिहिलं, "कधी कधी मला हार मानावीशी वाटते आणि सगळं सोडून बाबांकडे जावंसं वाटतं" नंतर बाबिलनं ही पोस्ट डिलीट केली.

29 एप्रिल 2020 रोजी वयाच्या 53 व्या वर्षी इरफानने मुंबईत अखेरचा श्वास घेतला. इरफाननं अनेक हिट चित्रपटांमध्ये काम केलं आहे. त्याच्या अंग्रेजी मिडीयम,पिकू,पान सिंग तोमर या चित्रपटांना प्रेक्षकांची विशेष पसंती मिळाली.

इरफानचा मुलगा बाबिल हा देखील अभिनेता आहे. बाबिलनं कला, फ्रायडे नाइट प्लॅन या चित्रपटांमध्ये काम केलं आहे. तसेच त्यानं द रेल्वे मॅन या वेब सीरिजमध्ये देखील महत्वाची भूमिका साकारली.