कंटेन्मेंट झोनमध्ये नवे भाडेकरू, घरेलू कामगारांना बंदी; प्रशासनाचा निर्णय
पुणे - प्रतिबंधित क्षेत्र (कंटेन्मेंट झोन) आणि नॉन कंटेन्मेंट झोनमधील नियमावलीच्या संभ्रमातून काही गृहनिर्माण सोसायट्यांमध्ये सभासद आणि पदाधिकाऱ्यांमध्ये वाद होत आहेत. कंटेन्मेंट झोनमध्ये अत्यावश्‍यक सेवा वगळता नवीन भाडेकरू, घरकाम करणाऱ्या किंवा इतर व्यक्तींना बंदी असेल, असे प्रशासनाने स्पष्ट केले आहे.
- पुण्याच्या बातम्या वाचण्यासाठी येथे ► क्लिक करा
महापालिका, ग्रामपंचायतीच्या प्रतिबंधित क्षेत्रात वैद्यकीय, आपत्कालीन सेवा, औषध विक्रीचे दुकाने आणि जीवनावश्‍यक वस्तूंचा पुरवठा वगळता अन्य व्यक्तींना प्रतिबंधित क्षेत्र (कंटेन्मेंट झोन) मध्ये प्रवेश करण्यास किंवा परिसरातून बाहेर पडण्यास बंदी आहे.
घरकाम करणाऱ्या व्यक्ती प्रतिबंधित क्षेत्राच्या बाहेर राहणाऱ्या कोणत्याही व्यक्तीच्या घरी, घर मालकाची इच्छा असल्यास स्वेच्छेने काम करता येईल. परंतु प्रतिबंधित क्षेत्रात राहणाऱ्या व्यक्तींना प्रतिबंधित क्षेत्राबाहेरील ठिकाणी घरकाम करण्यास परवानगी नाही.
प्रतिबंधित क्षेत्रामध्ये दूध, भाजीपाला, अत्यावश्‍यक सेवा देणारी वाहने पाण्याचे टॅंकर, रुग्णवाहिका, शववाहिका, अग्निशामक दलाचे वाहन, कचरा वाहतूक गाडी, त्यावरील कर्मचाऱ्यांना प्रतिबंधित क्षेत्रामध्ये प्रवेश करता येईल, अशी माहिती प्रशासनामार्फत देण्यात आली.
मदतनिसाला परवानगी पण...
ज्येष्ठ नागरिकांना, रुग्णसेवेसाठी मदतनीस व्यक्ती, घरकाम करणारी व्यक्ती, वाहनचालक यांची मदत घेता येईल. तथापि, मदत करणारी व्यक्ती प्रतिबंधित क्षेत्राच्या बाहेरील असावी.
पुणे जिल्ह्यातील (ग्रामीण) एकूण कंटेन्मेंट झोन ३१६
१८३ - पूर्ण झालेले कंटेन्मेंट झोन
१३३ - क्रियाशील कंटेन्मेंट झोन
प्रतिबंधित क्षेत्र जाहीर केल्यानंतर २८ दिवसांच्या कालावधीत संबंधित गृहनिर्माण सोसायट्यांमध्ये अत्यावश्‍यक वस्तूंचा पुरवठा आणि सेवा पुरविणारे कर्मचारी वगळता इतर व्यक्तीला बाहेर जाण्यास किंवा सोसायटीमध्ये येण्यास परवानगी नाही. घरकाम करणाऱ्या व्यक्ती, नवीन भाडेकरू आणि गाड्या धुणाऱ्या व्यक्तींना प्रतिबंधित क्षेत्रात परवानगी नाही.
- सचिन बारवकर, उपविभागीय अधिकारी, हवेली
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.