Breaking : 'कोविशिल्ड'च्या भारतातील चाचण्या थांबणार; सिरम इन्स्टिट्यूटचा मोठा निर्णय

सकाळ वृत्तसेवा
Thursday, 10 September 2020

ऍस्ट्राझेनेका आणि सिरम इन्स्टिट्यूट उत्पादन करणार असलेल्या या लशीच्या अंतिम टप्प्यातील मानवी चाचण्या जगभरात चालू आहे. इंग्लंडमधील स्वयंसेवकावर विपरीत परिणाम जाणवू लागल्याने तेथील चाचण्या स्थगित करण्यात आल्या आहेत.

पुणे : ऑक्‍सफर्ड विद्यापीठाच्या 'कोविशिल्ड' या कोरोनावरील लसीच्या भारतात चालू असलेल्या अंतिम टप्प्यातील मानवी चाचण्याही थांबविण्यात येणार आहेत. जागतिक स्तरावरील स्थगित झालेल्या चाचण्या आणि औषध नियंत्रकांच्या निर्देशानंतर हा निर्णय घेण्यात आल्याचे पुण्यातील सिरम इन्स्टिट्यूट ऑफ इंडियाच्या वतीने सांगण्यात आले आहे. 

मोठी बातमी : राममंदिराच्या देणगी खात्यावर चोरट्यांनी मारला डल्ला; लाखो रुपये केले लंपास​

ऍस्ट्राझेनेका आणि सिरम इन्स्टिट्यूट उत्पादन करणार असलेल्या या लशीच्या अंतिम टप्प्यातील मानवी चाचण्या जगभरात चालू आहे. इंग्लंडमधील स्वयंसेवकावर विपरीत परिणाम जाणवू लागल्याने तेथील चाचण्या स्थगित करण्यात आल्या आहेत. अशा प्रकारे अमेरिका, दक्षिण आफ्रिका, ब्राझीलमध्येही चाचण्यांना स्थगिती दिली असल्याचे 'नेचर'ने म्हटले आहे. भारतातील चाचण्यांसंदर्भात औषध नियंत्रकांनी (डीसीजेआय) सिरमकडे विचारणा केली असता त्यांनी पुढील मानवी चाचण्या घेण्यास असमर्थता दर्शवली आहे. 

कोरोना रुग्णांसाठी तंटामुक्तीचा अध्यक्ष बनला अॅम्बुलन्स ड्रायव्हर!​

अग्रेसर 'कोविशिल्ड' : 
- ऑक्‍सफर्ड विद्यापीठाने विकसित केलेली ही लस जगात सर्वात अग्रेसर लस आहे. जगभरात ऍस्ट्राझेनेका कंपनीच्या माध्यमातून मानवी चाचण्या घेण्यात येत आहे. 
- देशातील मानवी चाचण्या सहउत्पादक कंपनी असलेली सिरम इन्स्टिट्यूट घेत आहे. दुसऱ्या टप्प्यात पुण्यासह देशभरातील 100 स्वयंसेवकांना ही लस टोचण्यात आली आहे. हा दुसरा टप्पा सुरक्षितपणे पार पडला आहे. आता अंतिम टप्प्यातील चाचण्यांची प्रतीक्षा होती. 

चाचण्या का थांबल्या? 
- इंग्लंडमधील लस टोचलेल्या स्वयंसेवकांमध्ये विपरीत परिणाम दिसले. 
- अमेरिकेत राष्ट्रपतीपदाच्या निवडणुका जवळ आल्या आहेत. त्यामुळे तेथील औषध नियंत्रकांवर दबाव असण्याची शक्‍यता आहे. पर्यायाने चाचण्यांच्या दर्जाकडे दुर्लक्ष केल्याची शक्‍यता 'नेचर'या विज्ञान नियतकालिकात व्यक्त करण्यात आली आहे. 
- सामान्यतः मानवी चाचणीदरम्यान असे प्रकार पहायला मिळत असल्याचे तज्ज्ञ सांगतात. 

भारताच्या सार्वभौमत्वाशी तडजोड होणार नाही; राजनाथ सिंहांचा चीनला अप्रत्यक्ष इशारा​

आता पुढे काय? 
- एका तटस्थ समितीकडून ऍस्ट्राझेनेकाकडील वैद्यकीय माहितीची तपासणी करण्यात येईल. 
- विपरीत परिणाम जाणवलेल्या स्वयंसेवकाची योग्य तपासणी करण्यात येईल. 
- लस टोचलेल्या स्वयंसेवकांना इतर आजार झाला का? त्याचे परिणाम काय होणार हे तपासण्यात येईल. 
- संपूर्ण अहवाल आल्यानंतर पुढील चाचण्यांचा निर्णय घेण्यात येईल.

जागतिक स्तरावरील परिस्थितीचा आम्ही आढावा घेत आहे. ऍस्ट्राझेनेका चाचण्या पुन्हा सुरू करेपर्यंत भारतातील चाचण्या स्थगित करण्यात येत आहे. डीसीजेआयच्या सूचनांनुसार आम्ही पुढील कार्यवाही करू. 
- सिरम इन्स्टिट्यूट, पुणे. 

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Covishield vaccine trials pauses in India declared by Serum Institute