पालकांनो, प्रयोगशाळा घरी आणा; मुलांना दिवाळीची अनोखी भेट द्या!

पुणे : कोरोनाच्या पार्श्‍वभूमीवर शाळा बंद असल्यामुळे विद्यार्थ्यांना प्रयोगशाळेत जाणे शक्‍य होत नाही. विज्ञानात प्रयोगाचे अनन्य साधारण महत्त्व असून, दिवाळीत मुलांसाठी प्रयोगशाळाच घरी आणण्याची अनोखी शक्कल प्रा. डॉ. सतीश ठिगळे यांनी लढवली आहे. त्यांनी नातवांसाठी प्रयोगाचे साहित्य दिवाळी भेट म्हणून दिले आहे. 

- यंदाची दिवाळी पवार कुटुंबियांसाठी वेगळी; घेतला मोठा निर्णय​

घरच्या घरी विज्ञानाचे प्रयोग करण्यासाठी आणि मुलांना विज्ञानाची गोडी लागावी म्हणून अशा अभिनव प्रयोगाची आवश्‍यकता आहे. डॉ. ठिगळे सांगतात, "बालभारतीच्या विज्ञान आणि तंत्रज्ञानाच्या पुस्तकावर नजर टाकल्यावर मला प्रात्यक्षिकांसाठी लागणाऱ्या साहित्याची माहिती मिळाली. ही उपकरणे आणि रसायने घरीच सहज उपलब्ध करून देणे शक्‍य असल्याचे माझ्या लक्षात आले. या निमित्ताने त्यांच्यामधील प्रात्यक्षिकांसंबंधीची भीती कमी होईल. म्हणून मी उपकरणांचा संच खरेदी केला.'' पालकांना संपूर्ण संच खरेदी करणे शक्‍य नसल्यास एखाद्या विशिष्ट प्रात्यक्षिका पुरता संच खरेदी करणेही शक्‍य आहे. विज्ञान शाखेत प्रवेश घेण्यापूर्वी नववी आणि दहावीच्या विद्यार्थ्यांसाठी हा उपक्रम महत्त्वपूर्ण असून, पालकांनी विद्यार्थ्यांना दिवाळीमध्ये ही भेट देण्याचे आवाहन डॉ. ठिगळे यांनी केले आहे.

- हजारो किमी प्रवास करुन कवडीपट येथे अवतरले पक्षी वैभव! पाहा मनमोहक फोटो

प्रयोग संचाच्या ढोबळमानाने किमती :
रसायनशास्त्र : 1500 रुपये 
भौतिकशास्त्र : 2,900 रुपये 
जीवशास्त्र : 900 रुपये 
कंपाउंड सूक्ष्मदर्शिका : 4,500 रुपये 

- यंदा दिवाळीत खण साडीचा ‘ट्रेंड; ऑनलाइन मार्केटमध्ये मोठी मागणी​

पालक काय करु शकतात.. 
- दिवाळीला इतर खरेदीला फाटा देऊन मुलांसाठी प्रयोगाचे संच खरेदी करू शकतात. 
- पुरेसे पैसे नसल्यास निवडक प्रात्यक्षिकांसाठी किंवा पाल्यांचा गट करून खरेदी शक्‍य 
- नववी आणि दहावी मिळून रसायनशास्त्र आणि भौतिकशास्त्राचे मिळून 12 तर जीवशास्त्राचे 12 असे एकूण 24 प्रयोग विद्यार्थ्यांसाठी अपेक्षित आहे. 

घरातील प्रयोगशाळेचे महत्त्व :
- विद्यार्थ्यांना प्रयोगातून विज्ञान शिकता येईल आणि मूलभूत संकल्पना पक्‍क्‍या होतील. 
- विज्ञान आणि प्रात्यक्षिकाबद्दलची विद्यार्थ्यामधील अनावश्‍यक भीती कमी होईल. 
- एक प्रकारे प्रयोगशाळा संस्कृती रुजेल.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)